22
Thu, Aug
0 New Articles

Istoria Badak SMI

Hafoin Timor-Leste hamrik nu’udar nasaun demokratiku ida iha sekulu 21, sekulu ne’ebé oferese evolusaun moris ema nian ne’ebé ho fasil maibe hamosu mos dezafiu ne’ebé signifikante. Dezafiu sira hanesan velosidade/lalais, seguru, korenti jerasaun (age wave), opsaun, estilu de vida, kompetisaun presu, valores aumenta, servisu kliente, dependensia teknolojia, garante de kualidade, buat hirak ne’e afeta mos ba dezenvolvimentu Timor-Leste nian nu’udar nasaun ida.

Enkontru dala primeiru iha Praia do Coceiros hodi diskute kona-ba harii SMIEnkontru dala primeiru iha Praia do Coceiros hodi diskute kona-ba harii SMI

Presaun sira ne’ebé mosu mai entre global ho lokal, entre universal ho individual, entre tradisaun ho modernizasaun, entre kresimentu tempu naruk ho tempu badak, entre kompetisaun ho oportunidade hanesan, entre haluan edukasaun ho kapasidade adaptadu, entre espiritual ho material, buat sira ne’e dezafia mos progresu nasaun no ninia ema sira.   

Sentru Mídia Investigativu (SMI) moris atu ajuda halo balansu ba moris ne’ebé la balansu ne’e. SMI hamrik atu kontribui hodi oferese opsaun sira ne’ebé atu ajuda ema bele halo desizaun ba ninia moris ho lolos. Liuhosi SMI ninia kobertura investigativu bele ajuda hamosu parte balun ne’ebé lakon iha aspetu sira moris nian. Ezistensia SMI nian sei sai opsaun ida hodi ajuda hatudu dalan ba dezenvolvimentu Timor-Leste.

Sesaun diskusaun ne’ebé diriji husi Atay Alves
Sesaun diskusaun ne’ebé diriji husi Atay Alves

Razaun hirak ne’e mak dada eis jornalista investigativu sira nia atensaun, liliu sira ne’ebé uluk nu’udar fundador Centru Jornalista Investigativu Timor-Leste (CJITL) nomós jornalista investigativu sira seluk ne’ebé dadaun ne’e serbisu iha instituisaun mídia no orgaun komunikasaun sosiál sira iha Timor-Leste atu tau hamutuk komitimentu forte ida. Nune’e mak iha loron 18 fulan Febreiru 2017, iha Praia dos Couceiros – Dili, jornalista investigativu sira ne’e tur hamutuk hodi diskuti oinsa hamoris fila fali CJITL ne’ebé tinan 3 liu ona la hala’o ninia knar.

Primeiru enkontru hodi diskute kona-ba estatutu no logo ba SMI, iha Jardim 5 Maiu Colmera - Dili
Primeiru enkontru hodi diskute kona-ba estatutu no logo ba SMI, iha Jardim 5 Maiu Colmera - Dili

Rezultadu husi diskusaun ne’e maioria partisipante konkorda hodi harii sentru ka asosiasaun foun ida ho naran foun. Nune’e mak forum deside naran Sentru Mídia Investigativu, habadak bolu SMI mak nu’udar naran ba organizasaun mídia investigativu ida ne’e. Razaun fundamentu hosi desizaun ida ne’e mak atu haforsa serbisu kontrolu sosiál mídia sira nian hodi kontribui ba hametin soberanu nasaun nian iha aspetu hothotu.

Membru sira mos deside hodi halo enkontru regular atu diskuti kona-ba estabelesimentu SMI nian nune’e mak forum deside mos “ekipa konsolidasaun” hodi prepara estatutu no emblema organizasaun nian. Iha inisiu prosesu ida ne’e, membru sira mos halo konsulta ho fundador sira CJITL no husu sira nia konsiderasaun ba hamosu organizasaun foun ida ne’e.

Enkontru segundu hodi diskute kona-ba estatutu SMI. Membru fundador sira seriu lee artigu sira iha Estatutu SMI nian
Enkontru segundu hodi diskute kona-ba estatutu SMI. Membru fundador sira seriu lee artigu sira iha Estatutu SMI nian

Durante periodu konsolidasaun iha enkontru dala rua entre fundador sira hodi diskute timeline serbisu ba prosesu perparasaun estatutu, emblema no sitíu publikasaun ba organizasaun SMI rasik. Ikus mai, liu fulan 3 fundador sira deklara ofisialmente ejistensia SMI iha loron 11 Juñu 2017 iha Fatuhada, Dili, Timor-Leste, liu husi reuniaun extra-ordinariu.  

Pin It