Primeiru-ministru timoroan, Mari Alkatiri, aprezenta iha loron-kinta dadeer, oras lokal, ba xefe Estadu lista "besik kompletu" hosi membru sira seluk hosi Governu konstitusional dahitu ne'ebé sei simu pose iha loron-segunda.
"Aban ha'u lori lista ba Prezidente no iha loron-segunda, demora liu to'o simu pose. Sei hanesan lista ida ne'ebé besik kompletu, maibé sei iha negosiasaun balun", Mari Alkatiri hatete iha deklarasaun ba jornalista sira.
Alkatiri ko'alia bainhira foin fila, ba dala uluk iha tinan 11 nia laran, ba Palásiu Governu, ne'ebé antes nia jura ona la tama fali iha loron ne'ebé nia demiti aan, bainhira sai nu'udar xefe hosi Governu konstitusional dahuluk, iha loron 26 Juñu 2006.
Iha konversa badak ida ho jornalista sira no lahó pormenor sira kona-ba kompozisaun, Alkatiri hatete katak sei aproveita nia reuniaun semanal daruak ho Prezidente Repúblika, Francisco Guterres Lu-Olo, iha loron-kinta dadaeer, hodi entrega lista hosi membru sira seluk Governu nian.
To'o agora, simu de'it pose membru na'in 12 hosi Governu, inklui primeiru-ministru, ne'ebé nia hatete katak elenku governativu karik sei iha elementu na'in 30.
Fonte hosi ezekutivu hatete ona ba Lusa katak númeru ne'e karik bele "aumenta oituan" no sei hanesan Governu ida ne'ebé "extensu tebes iha polítika" ho elementu hosi forsa polítika oioin.
