Membru foun na'in ruanulu resin hosi Governu timoroan, inklui elementu sira ho ligasaun ba partidu sira opozisaun nian PLP ho CNRT, simu pose iha loron-tersa oinmai, iha ona na'in 12 ne'ebé hala'o ona nia knaar - maibé ezekutivu seidauk kompletu.
Lista hosi membru foun sira Governu nian, ne'ebé maka Lusa iha asesu, inklui Mariano Sabino, líder hosi Partidu Demokrátiku (PD) - parseiru hosi Frente Revolucionária do Timor-Leste Independente (Fretilin) iha koligasaun Governu nian - ne'ebé kaer pasta ministru Estadu nian no ministru Rekursu Mineral sira nian.
Sei simu mós pose dirijente hosi Congresso Nacional da Reconstrução Timorense (CNRT) Ágio Pereira, nu'udar ministru Adjuntu hosi primeiru-ministru nian ba Delimitasaun Fronteira Tasi nian no José Reis, ne'ebé sei sai nu'udar ministru Adjuntu hosi primeiru-ministru nian ba Asuntu sira Governasaun nian.
Lista ne'e entrega ona hosi primeiru-ministru, Mari Alkatiri, ba xefe Estadu, Francisco Guterres Lu-Olo, iha loron-kinta ne'ebé asina ona dekretu indijitasaun nian ne'ebé publika iha Jornal Repúblika.
Fernando Hanjam, dosente hosi Universidade Timor-Leste nian ne'ebé hasai doutoramentu iha Aveiro, hanesan ministru Edukasaun no Hernâni Coelho, ne'ebé uluk hanesan ministru Negósiu Estranjeiru iha Governu anterior, agora kaer knaar nu'udar ministru Petróleu nian.
Lista ne'ebé fó sai iha loron-sesta ne'e inklui visi-ministru na'in 10, Mariano Renato Monteiro da Cruz (Dezenvolvimentu ba Obra Públika); Abrão Oliveira, Dezenvolvimentu ba Habitasaun, Ordenamentu ho Ambiente no Inácio Moreira, ne'ebé mantén iha Dezenvolvimentu ba Transporte ho Komunikasaun.
José Anuno sei sai nu'udar visi-ministru Administrasaun Estatal, José Neves (ne'ebé hanesan kandidatu prezidensial iha eleisaun ikus ne'e no iha ligasaun ba Partidu Libertasaun Popular - PLP) sei sai nu'udar visi-ministru Edukasaun ho Kultura no Luís Lobato sei sai nu'udar visi-ministru Saúde nian.
Maski seidauk hatene sé maka sai nu'udar ministru Justisa, maibé nia fatin importante daruak sei okupa hosi Sebastião Dias Ximenes, bainhira Jacinto Gusmão kaer knaar nu'udar visi-ministru Komérsiu ho Indústria nian no Deolindo Silva sei kaer pasta hanesan visi-ministru Agrkultura no Peska nian.
Sei simu mós pose iha loron-tersa sekretáriu Estadu balun maka hanesan Cipriano Ferreira ba Agrikultura ho Peska, Matias Boavida hosi Konsellu Ministru no Komunikasaun Sosial nian no Osório Florindo da Conceição Costa iha Desportu ho iha Promosaun ba Kompetisaun Importante sira.
Sekretáriu Estadu ba Juventude no Serbisu foun maka Nivio Magalhães no sekretáriu Estadu ba Veteranu sira maka André da Costa, ne'ebé koñesidu hanesan L4 no ne'ebé hanesan mós militante hosi PLP.
Elementu foun sira na'in 20 sei hamutuk ho membru na'in 12 ne'ebé maka simu ona pose iha loron 15 liubá inklui mós xefe ezekutivu Mari Alkatiri.