Dili – SMI, Kordenador Jerál Sentru Mídia Investigativu – SMI, Atay Alves husu ba governu Timor-Leste atu harii monumentu ba jornalista sira ne’ebé mate iha tinan 1975 - 1999 tanba kontribui ba luta libertasaun nasionál.
“Ami rekomenda ba Governu presiza harii monumentu ba jornalista sira tantu jornalista estranjeiru sira no jornalista timoroan ne’ebé mate iha tinan 1975 to’o 1999. Sira mate tanba públika sai informasaun kona-ba hahalok militar durante okupasaun iha rai ida ne’e”, Tenik nia iha loron selebrasaun Balibo Five ba dala 42, Segunda, (16/10) foin lalais ne’e iha Palasiu Governu nia oin.
Eis Kordenador Peskiza Fundasaun Mahein – FM ne’e esplika katak loron Balibo Five ohin (16/10) nu’udar loron importante iha istoria mundu jornalizmu iha Timor-Leste. Ho nune’e, SMI realiza atividade reflesaun no homenajen nu’udar jestu ida fo valorizasaun ba maluk jornalista Australianu na’in 5 ne’ebé mate iha Balibo, tan deit halo kobertura kona-ba forsa Indonesia nia hahalok durante invasaun iha tinan 1975.
Nia kontinua katak, atividade reflesaun liu husi loke filmajen Balibo Five iha parte dadersan ho kandidatu jornalista investigativu hamutuk ema na’in 40 iha fatin formasaun SMI, Taibesi-Dili. No, parte lorokraik halo atividade homenajen no sunu lilin Tasi ibun Palasiu Governu nian.
“Ami halo atividade simples rua hodi selebra loron Balibo Five ne’e. Dadersan ami loke filme Balibo Five ho maluk jornalista foun sira iha SMI, no lorokraik tuku 5:30 ami sei sunu lilin no karii aifunan ba tasi, iha Palasiu Governu nia oin”, dehan eis jornalista CJITL ne’e.
Durante atividade homenajen, Kordenador Jerál SMI ne’e mós husu Governu atu hasai dekretu lei ida hodi halo aprovasaun ba loron 16 Outobru nu’udar loron liberdade imprensa nasionál ba Timor-Leste. “To’o ohin loron jornalista timoroan sira selebra deit loron liberdade imprensa mundial nian ne’ebé monu iha loron 3 Marsu, Timor-Leste presiza iha ninia loron liberdade imprensa nasionál rasik”, dehan atay.
Iha fatin hanesan, Prezidenti Asosiasaun Jornalista Timor Lorosa’e – AJTL, David Hugo apresia ba insitiativa SMI ne’ebé organiza atividade reflesaun no homenajen iha loron Balibo Five hodi fo hanoin hikas ba sira mate tanba kontribui ba luta libertasaun nasionál.
“Apresia tebes ba inistiativa husi kolega sira iha SMI, tuir lolos atividade hanesan ne’e organiza husi Asosiasaun Jornalista hanesan AJTL ou Conselho Imprensa – CI. Maibe, hau atu hateten katak AJTL la’os lakohi halo atividade iha loron balibo five ne’e, AJTL sei organiza reflesaun ba selebrasaun loron Balibo Five iha Balibo, loron 23 semana oin”, Katak nian, wainhira hato’o ninia hanoin iha eventu homenajen iha loron Balibo Five ne’ebé organiza husi SMI.
Membru Fundador Centru Jornalista Investigativu Timor-Leste –CJITL ne’e mós esplika katak konkorda ho ejizensia SMI ne’ebé husu ba Governu atu kria dekretu lei ruma hodi aprova loron 16 Outobru sai loron ba libderdade nasionál. Nia hatutan, antes ne’e iha loron boot ba liberdade imprensa AJTL sempre hato’o proposta Governu atu deside loron Balibo Five sai loron nasionál ba liberdade imprensa iha Timor-Leste, maibe to’o ohin loron Governu kontinua seidauk tau iha konsiderasaun.
Maluk jornalista na’in 5 ne’ebé mate iha Balibo maka hanesan Greg Shackleton (29), Tony Stewart (21) husi Australia, Gary Cunningham (27) husi Nova Zelandia , Brian Peters (24) no Malcolm Rennie (29) husi Englatera. Jornalista hirak ne’e mai husi estasaun televizaun Channel 7 dan Channel 9 Australia.
Atividade reflesaun no homenajen ba loron Balibo Five ne’e hetan partisipa husi reprezentante husi Conselho Imprensa, membru fundador SMI, jornalista AJTL nomós Konselleru SMI no maluk jornalista sira husi instituisaun mídia oi-oin, (Barros/SMI)
