Dili- SMI, Sekretariu Jerál Partidu FRETILIN Mari Bin Amude Alaktiri prefere atu hakotu empase politika iha rai-laran Prezidente Republika deside Eleisaun Antisipada - EA hodi nune’e povu maka halo desizaun ikus.
“Atu hakotu empase politika Fretilin prefere ba Prezidente da Repúblika atu fo fila ba povu mak deside”, dehan Mari Alkatiri ba jornalista sira, iha Palasiu Prezidensiál Ai-tarak-Laran, Tersa,(23/01).
Tuir Mari Alkatiri katak la iha opsaun seluk, dalan uniku ba FRETILIN maka eleisaun antisipada, maske nune’e nia kontinua rekuiñese katak Prezidente Republika iha kompetensia tomak atu foti desizaun.
Atual Primeiru Ministru VII Governu Konstitusional ne’e fiar an katak wainhira PR deside eleisaun antisipada maka garante FRETILIN sei manan no sei la’o mesak, maibé governu sei nafatin ho PD.
Iha parte seluk porta voz Bloku Aliansa Maioria Parlamentar – BOAMP, Taur Matan Ruak prontu simu no apoiu desizaun saida deit husi Prezidenti Republika - PR Francisco Guterres Lu – Olo hodi hakotu empase politika iha rai-laran.
“Ami reintera fo apoiu tomak ba desizaun saida deit maka iha, ami nia partidu simu i garantia no prontu para kumpri”, dehan nia ba jornalista sira hafoin hasoru malu ho PR iha Palasiu Presidensial Aitarak-Laran, Dili, Tersa, (23/01).
Prezidenti Partidu Libertasaun Popular – PLP mós konkorda katak presiza iha desizaun ruma hodi hakotu empase politika maske ninia rezultadu diak at.
“Ami nia partido pozisaun ne’ebé ami transmite ba Prezidente da Repúblika maka iha situasaun hanesan ne’e, diak liu iha desizaun duke la halo desizaun, nia bele a’at mas, tenki hasai”, Tenik eis jeneral fitun rua ne’e.
Eis Prezidenti Republika ne’e mós esklarese katak durante sorumutu ho PR ninia parte laiha opsaun ruma hodi sujere maibe prontu simu rezultadu husi desizaun PR nian.
“Ami laiha opsaun ba prezidente, maibé desizaun ne’ebé mak iha prontu atu simu tamba ida ne’e maka desizaun”, katak Eis Komandate Jerál F-FDTL ne’e.
Prezidente PLP hasoru malu ho Prezidente da Republika hodi buka solusaun ba politika atúal iha rai laran.