Dili – SMI, Reúniaun Konsellu Estadu hodi deside distinu nasaun relasiona ho situasaun polítika iha rai-laran ne’ebé preside husi atúal Prezidente Repúblika Francisco Guterres “Lu Olo” la hetan partispa husi eis Prezidente Repúblika Xanana Gusmão ho Ramos Horta tanba hala’o hela serbisu estadu iha rai estranjeiru.
“Eis Prezidente-da-Repúblika na’in rua Xanana Gusmão no Ramos Horta la tuir iha reuniaun ne’e tanba hala’o atividade estadu nian iha tasi balun”, dehan Komunikadu Imprensa ne’ebé SMI asesu husi Mídia Prezidente Repúblika, Kuarta, (24/01).
Tuir komunikadu ne’e katak membru Konsellu Estadu ne’ebé partisipa iha enkontru ne’e kompostu husi líder atúal orgaun soberanu sira, eis titulares no reprezentante sira husi instituisaun seluk ne’ebé hili husi Parlamentu Nasionál nomós hili husi Prezidente Repúblika rasik.
Membru Konsellu Estadu ne’ebé partisipa iha enkontru dahuluk ne’ebé prezide maka atúal Prezidente Repúblika Francisco Guterres Lu Olo, atual Primeiru Ministru Mari Alkatiri, eis Prezidente Taur Matan Ruak, atual Prezidenti Parlamentu Nasional Aniceto Guterres, José Marcelino Cabral Belo, Aurora Ximenes, Virgilio da Costa Hornai, Virgilio Smith, José dos Santos “Naimori Bukar” ne’ebé Parlamentu Nasionál maka hili, Oscar Lima, Faustino Godinho Gonçalves, da Costa, Alcino Araújo Barris, Maria Dadi Soares Magno no Laura Abrantes ne’ebé husi atúal Prezidente Republika’, dehan Komunikadu ne’e.
Komunikadu ne’e mós sita katak antes halo reuniaun, membru Konsellu Estadu sira halo juramentu de posse iha palasiu presidensiál Bairo-Pite ne’ebé lidera husi Prezidente Repúblika Francisco Guterres Lu Olo.
Komunikadu ne’e mós esplika katak Konsellu Estadu nu’udar orgaun konsulta polítika ba Prezidente Repúblika wainhia mosu kazu ruma ou situasaun ruma ne’ebé nasaun infrenta. No, tuir Konstituisaun Repúblika katak wainhira Prezidente Repúblika atu foti desizaun ruma kona-ba kazu ka situasaun polítika ne’ebé nasaun infrenta maka presiza rona uluk hanoin ka opiniaun husi Konsellu Estadu.
Nune’e mós komunikadu ne’e relata katak membru Konsellu Estadu ne’ebé partisipa iha reuniaun dahuluk ne’e hothotu fiar katak Prezidente Repúblika sei foti desizaun ne’ebé justo ba situasaun polítika iha rai-laran.(*)
