Dili – SMI, Loron sexta aban, (26/01) nu’udar loron ikus ba Prezidente Repúblika Francisco Guterres Lú Olo hodi foti desizaun finál kona-ba situasaun polítika iha rai-laran depois reuniaun membru Konsellu Estadu iha loron Kuarta (24/01) foin lalais ne’e. Públiku dadaun ne’e hein hela desizaun prezidente ne’ebé bele kria paz no hakmatek.
Tuir ajenda, Prezidente Repúblika sei fo sai anunsiu formalmente kona-ba ninia desizaun hodi hakotu situasaun polítika rai-laran iha tuku 10:00 dadersan, iha Palasiu Prezidensial Nicolau Lobato, Bairo-pite, Dili.
“Este evento terá lugar no próximo dia 26 de Janeiro de 2018, às 10h00 no Palácio Presidencial Nicolau Lobato”, tuir Komunikadu ne’ebé SMI asesu, Kinta, (25/01).
Konvite formal husi Gabineti PR kona-ba atu halo desizaun ba impase politika iha rai-laran*
Antes ne’e, iha kuarta (24/01) Prezidente Lú Olo preside reúniaun Konsellu Estadu atu deside distinu nasaun relasiona ho situasaun polítika iha rai-laran. Reuniaun Konsellu Estadu ne’e la partispa husi eis Prezidente Repúblika Xanana Gusmão ho Ramos Horta tanba hala’o hela serbisu estadu iha rai estranjeiru.
Membru Konsellu Estadu ne’ebé partisipa iha enkontru dahuluk momento ne’e maka atúal Primeiru Ministru Mari Alkatiri, eis Prezidente Taur Matan Ruak, atual Prezidente Parlamentu Nasionál Aniceto Guterres, José Marcelino Cabral Belo, Aurora Ximenes, Virgilio da Costa Hornai, Virgilio Smith, José dos Santos “Naimori Bukar” ne’ebé Parlamentu Nasionál maka hili, Oscar Lima, Faustino Godinho Gonçalves, da Costa, Alcino Araújo Barris, Maria Dadi Soares Magno no Laura Abrantes ne’ebé husi atúal Prezidente Repúblika
Reuniaun membru Konsellu Estadu sira ne'e hahu ho juramentu de pose, no taka ba mídia no públiku. (*)
We use cookies to ensure that we give you the best experience on our website.
