Dili – SMI, Prezidente Repúblika Francisco Guterres Lú Olo liu husi desizaun finál Sexta, (26/01) hodi desolve Parlamentu Nasionál – PN tanba bázea ba artigu 86 alinea f Konstituisan Repúblika Demokrátika Timor-Leste – KDRTL nian.
“Prezidente Repúblika deside, tuir artigu 86, al. f) Konstituisaun Repúblika: -Disolve Parlamentu Nasional”, dehan Lú Olo liu husi diskursu ofisial iha Palasiu Presidensial, Sexta, (26/01).
Husi ninia desizaun ne’e, PR husu ba povu Timor-Leste atu vota fila fali iha eleisau antisipada nu’udar povu ne’ebé moris iha nasaun demokrásia no estadu de diretu-demokrátiku.
“Ita hotu-hotu bá VOTA fila fali! Atu haforsa ita-nia Demokrasia no Estadu-de-Direitu Demokrátiku’, Dehan eis Falintil ne’e.
Ho nune’e, Komandante Supremu Forsa Armada ne’e husu ba povu Timor-Leste atu mantein paz no hakmatek hodi kontinua tuir fila fali eleisaun antisipada ne’ebé akontese iha tempu badak nia laran.
“Ho haraik-an Prezidente husu ba povu atu VOTA fila fali, iha eleisaun antesipada”, dehan Eis Prezidente PN I Lejislatura ne’e.
Nia promente katak iha tempu badak sei fo sai formalmente data ba eleisaun antisipada.
“Prezidente Repúblika sei marka data ba eleisaun antesipada, tuir lei haruka”, tenik nia.