Dili – SMI, Primeiru Ministru Mari Alkatiri hateten katak ba futuru membru Governu labele halo interfere ba serbisu redasaun Radio Televisão Timor Leste – RTTL hodi nune’e bele garante indepensia iha prosesu fahe informasaun ba públiku.
“Membru Governu labele interfere serbisu RTTL”, dehan Mari iha seremonia tomada de pose ba Prezidente Konsellu RTTL, Gil da Costa, iha Salaun Presidensiál Conselho Ministros, Palasiu Governu, Kinta, (10/02).
Iha seremonia tomada de pose ne’e, Primeiru Ministru espresa ninia fiar katak Presidente Konsellu Administrasaun RTTL foun iha vontade boot atu hadi’a diak liu tan serbisu RTTL iha futuru.
Iha momentu hanesan, liu husi diskursu, Presidente Konsellu Administrasaun RTTL eleitu Gil da Costa husu ba funsionariu RTTL valoriza serbisu ekipa duke pesoál hodi nune’e bele hetan rezultadu ne’ebé diak ba povu no nasaun.
“Husu ba ekipa RTTL labele serbisu ho superman maibe serbisu ho super team”, dehan Gil iha ninia diskursu hafoin simu tomada de pose husi PM.
Partisipa iha seremonia tomada de pose ne’e maka hanesan Primeiru Ministru, eis Presidente Konsellu RTTL, Milena Abrantes, Presidente Conselho Imprensa Virgilio da Silva Guterres no konvidadu seluk.
Gil da Costa sei sai Prezidente Konsellu Administrasaun RTTL husi periodu 2018 to’o 2022 (Editor, Mateus Barros).
