Dili-SMI, Jeneral Indonesia Gatot Nurmantyo nu’udar pesoál ida husi jeneral sira seluk ne’ebé uluk lidera forsa hodi halo invazaun ba Timor-Leste durante tinan 24 nia laran, deklara iha mídia nasionál sira katak lahatene kona-ba kazu Saudozu Nicolau Lobato nia mate.
Komandante boot forsa defeza nasional Indonesia ne’e esplika katak maske rasik lidera militar mai Timor-Leste iha tinan 1983 nu’udar tenente ne’ebé laiha ligasaun direta ho kazu oho Presidente Nicolau Lobato.
“Hau uluk mai iha ne'e tinan 1983 nu'udar letnan, hau lahatene problema ne'e”, dehan Gatot ba jornalista sira iha Kinta, (01/02) hafoin enkontru ho Komandante F-FDTL Lere Anan Timor iha Kuartel Jerál Fatuhada.
Jeneral fitun hat ne'e deklara katak laiha relasaun direta kona-ba prosesu kazu oho saudozo Nicolau Lobato tanba durante ninia mandatu iha Timor-Leste hala’o operasaun iha ai-laran deit.
Saudozu Nicolau Lobato mate iha loron 31 fulan Dezembru tinan 1978 iha area Turiskai tanba hetan tiru iha kabun husi milítar espesiál (Kopasus) ne’ebé lidera husi Jenerá Prabowo Subianto.
Durante ne’e Governu Timor-Leste halo hela esforsu oi-oin liu husi diplomasia entre Timor-Leste ho Indonesia hodi lori fila fali mate isin saudozo Nicolau Lobato mai Timor-Leste. (Editor, Lariwa)
