Dili - SMI, Aliansa ba Mudansa no Progresu – AMP ne’ebé kompostu husi PLP, CNRT no KHUNTO durante ne’e hein hela surat “cinta” kona-ba membru Komisaun Permanente nian maske sira rasik hatama ona lista depois Prezidente Parlamentu Nasional – PPN dezolve bankada parlamentar iha fulan kotuk.
“Dezde iha loron 26 fulan Janeiru to’o agora bankada seidauk simu karta ruma atu husu membru nia naran ba komisaun permanente. Husi bankada tolu hanesan, PLP, KHUNTO, no CNRT ami halo tiha ona lista no hatama tiha ona iha semana kotuk”, Dehan Xefi Bankada CNRT, Arão Noe ba SMI ne’e foin lalais ne’e iha Parlamentu Nasionál – PN.
Deputadu husi partidu CNRT ne’e konsidera PPN viola ona rejimentu internal PN no Konstituisaun artigu 102 kona-ba funsaun no knár husi komisaun permanente hodi akompaña atividade Governu nian.
Arão Noe esplika katak AMP mós aprezenta ona proposta foun ba meja PN hodi hein diskusaun para bele aprova no sai regulamentu ba funsionamentu komisaun permanente. Tanba regulamentu komisaun permanente ne’ebé dadaun PN uza ne’e aprova antigamente iha tinan 10 liu ba.
“Ami mós apresenta ona ami nia proposta ida para parlamentu aprova atu sai hanesan regulamentu interinu ba komisaun permanente ninia funsionamentu, tamba durante ne’e iha duni mais regulamentu ne’ebe aprova iha tinan 2008. Hein katak Prezidente Parlamentu iha agenda atu diskute ida ne’e para sai hanesan regulamentu ba funsionamentu komisaun permanente nian”, dehan nia.
Prezidente Parlamentu Nasionál Aniceto Guterres rasik deklara iha loron 29 fulan Janeiru wainhira intervista ho SMI deklara katak prepara ona karta hodi diriji ba bakanda parlamentar hodi indijita membru deputadu sira hodi hola parte iha komisaun permanente ne’e rasik.
“Prepara ona karta ida ba bankadas parlamentares atu indijita ba membru deputadu sira atu hola parte iha komisaun permanente, no iha komisaun permanente, rezolusaun ne’e aprova tiha ona hamutuk deputadus 19”, esplika nia iha fulan kotuk. (Editor, Lariwa).
