Dili – SMI, Prezidente Bankada partidu Fretilin, deputadu Francisco Miranda Branco ho fiar an hateten katak partidu CNRT uza projetu hamutuk 148 hodi sosa votu durante periodu eleisaun jerál 2017.
“Hau hateten ida ne’e tamba iha duni konfirmasaun wainhira tama ona kampaña, iha tinan 2017 governu fahe projetos objetivo saida, 148 projetos iha tempu ne’ebé tuir lolos labele ona atu hasai desizaun”, dehan Branco, Kinta, (08/02) iha uma fukun PN.
Nia aumenta katak maske CNRT koko sosa votu ho projetu maibe la susesu tanba povu haree rezultadu ukun tinan 10 ne’ebé gasta osan arbiru ikus mai povu fo sansaun ba CNRT lakon kadeira 8 iha PN.
Branco mós hatutan, ninia parte fo agradesementu ba VII Governu ne’ebé husu ona ba Camára de Contas hodi hala’o auditoria ba ministériu hothotu hodi garante transparansia no boa governasaun.
Responde ba deklarasaun Xefi Bankada Fretilin ne’e, deputada Bankada CNRT Camerlita Caetano Moniz sei hato’o keisa formal ba Ministériu Públiku tanba konsidera nu’udar duun matak partidu CNRT sosa votu husi povu Timor-Leste
“Tenki hato’o keisa ne’e ba ministériu públiku tanba ida ne’e nu’udar frau de eleitorál tamba temi lolos deit katak partidu CNRT sosa votos”, dehan Carmelita.
Iha parte seluk, deputada Maria Angelina Sarmento husi bankada PLP sadik Fretilin atu lori ba tribunal karik iha evidensia ruma ne’ebé justifika katak CNRT sosa votu.
Tanba tuir nia katak hahalok sosa votu ne’e viola lei eleitorál ne’ebé PN rasik aprova ona nomós kódigu penál Timor-Leste nian.
“Hau hakarak komenta lalais deit kona-ba dehan katak sosa votos i hatene muito bem iha fatin balu ke ema sosa votos I se ita boot sira iha evidensia tansa maka ita boot sira la apresenta keixa, iha lei eleitorál aprovadu husi parlamentu nasional rasik ita mós iha kodigu penal ne’ebe iha preve situasaun lubuk ida ne’ebe relasiona ho krime eleitorál”, dehan Angelina. (Editor, Mateus Barros).