Dili – SMI, "Agora dadauk moras ne’ebé rejista ás liu iha klinika Bairopite maka moras pobreza Tubercolozia (TBC), tuir mai maka moras mal-nutrisaun, toba fatin iha sala ida ema na’in rua toba kama ida”, hateten Diretór Klinika Bairopite, Daniel Murphy ba SMI iha ninia serbisu fatin Bairopite, Kuarta, (14/02).
Doutor Daniel Murphy mós dehan katak kada loron klinika refere simu pasiente maizumenus hamutuk ema na’in 300 ne’ebé halo tratamentu ka konsulta iha klinika refere, maibe nia parte hetan difikuldade boot tanba aimoruk la sufisiente nomós ekipamentu importante sira hanesan makina rasis atu bele ajuda pasiente sira.
Ho nune’e, nia husu ba Governu liu-liu Ministériu Saude atu bele ajuda ekipamentu sira nomós aimoruk ne’ebé sufisiente hodi bele atende ba pasiente sira ne’ebé halo tratamentu iha klinika refere.
“Ekipamentus no material menus hanesan sala, osan, aimoruk menus, no ekipamentu atu halo rasis ba moras mós laiha. Sé, hau iha finanseiru sufsiente, hau bele atende ema”, dehan Murphy.
Nia haktuir katak hahu husi tinan 1999 mai iha Timor-Leste halo ona konsulta ba pasiente hamutuk juta ida resin. (Editor, Mateus Barros).
