Dili – SMI, Prezidente Bankada Partidu Kongresu Nasional Rekonstrusaun Timor (CNRT, sigla protuges), Arão Noe kontra deklarasaun Primeiru Ministru Mari Alkatiri kona-ba Governu nia planu atu hamosu dekretu lei hodi sidadaun hotu bele vota livre iha Eleisaun Antisipada.
Tuir Arão Noe katak atu muda lei eleitorál tenki liu husi prosesu alterasaun lei ne’ebé presiza liu husi plenaria Parlamentu Nasionál – PN, la’os halo fali dekretu lei ida hodi altera lei seluk.
“Atu muda lei eleitorál tenki iha alterasaun ba lei, laos dekretu lei maka altera fali lei. Mais Primeiru Ministru dehan fali katak dekretu lei maka altera fali lei ne’e sala boot”, dehan deputadu bankada CNRT ne’e iha PN, Kinta, (15/02).
Razaun Governu liu husi PM Alkatiri halo deklarasaun hodi hamosu dekretu lei hodi fasilita sidadaun sira hodi vota iha kualker fatin tanba bázea ba esperensia eleisaun jerál 2017 ne’ebé hatudu taxa partisipante eleitorál menus tebes.
Razaun seluk husi Governu muda lei eleitorál atu fasilita funsionariu nomós sidadaun sira ne’ebés serbisu iha fatin dook atu bele tuir eleisaun refere.
“Purke ita ba mai udan no anin tau, sira ne’ebé serbisu iha Dili tenki vota iha Dili’, tenik PM Mari foin lalais ne’e iha Kampus Sentrál UNTL.
Iha fatin ketak Prezidente Bankada FRETILIN Francisco Miranda Branco konkorda ho planu Governu tanba bele fasilita estudante sira hodi labele dezloka ba Munisipiu wainhira atu tuir eleisaun.
Nia mós deskonkorda ho argumentu Arão Noe kona-ba labele halo alterasaun ba lei ho dekretu lei. Nia fó razaun katak intermu tekniku ne’e la’os lei, maibe dekretu lei ne’ebé bele halo mudansa ba lei eleitorál. (Editor, Lariwa).