Dili-SMI, Membru Falintil-Forsa Defeza Timor Leste – F-FDTL no Polísia Nasionál Timor Leste – PNTL kontinua sai autor ba violénsia durante ne’e iha kapitál Dili no munisipiu Likisa.
Tuir relatóriu NGO Belun mensiona katak durante fulan Dezembru 2017 to’o Janeiru 2018 iha insidente violensia hamutuk 14 ne’ebé involve husi membru F-FDTL no PNTL.
“Sistema AtReS iha Dezembru 2017 too Janeiru 2018 mós rekolla insidente violénsia hamutuk 14 ne’ebé involve pesoál PNTL no F-FDTL”, Hekerek iha Relatóriu ne’ebé SMI asesu liu husi sitíu ofisiál Belun nian.
Relatóriu ne’e relata katak numeru membru PNTL mak barak liu involve iha insidente violénsia kompara ho membru F-FDTL.
“Pesoál PNTL involve iha insidente violénsia akontese dala 10 no pesoál F-FDTL involve iha insidente violénsia dala 4”, relata husi relatoriu Belun.
Relatoriu refere esplika klean liu tan katak membru F-FDTL no PNTL hirak ne’ebé involve iha insidente violénsia mak hanesan insidente violénsia uza forsa, insidente violensia tanba hemu lanu, insidente violénsia entre membru polisia-forsa ho ema sivil nomós entre pesoál militar ho membru polísia rasik.
“Insidente violénsia hirak ne’e akontese tanba hala’o sira nia knaar no uza forsa maka’as, iha insidente balun akontese tanba hemu tua lanu, insidente violénsia balun tanba involve iha problema partikulár família nian no balun akontese entre pesoál seguransa no pesoál defeza”, katak relatoriu refere.
Mensiona iha relatóriu ne’e katak maioria membru militar no polísia involve insidente violénsia iha munisipiu Dili hanesan kapitál nasaun nomós iha munisipiu Likisa. Maioria insidente violénsia ne’ebé involve husi membru militar no polisia ne’e akontese iha kapitál Dili.
“Husi insidente hirak ne’e, númeru as liu mak akontese iha Munisipiu Dili, akontese dala 10 no tuir mai fali akontese iha Munisipiu Likisá akontese dala 4”, relata husi relatóriu ne’e.
Relatóriu ne’e sita mós kona-ba insidente ne’ebé involve husi membru Polísia Militar hodi baku na’ok ten ida to’o grave no tama ICU iha Suku Kuluhun, Postu Administrativu Kristu Rei, Munisipiu Dili, iha loron 26 Janeiru 2018. (Editor, Lariwa).
