26
Wed, Jun
0 New Articles

Eis Deputadu Husu TR Desolve Bankada CNRT, PLP no KHUNTO iha PN

Eis Deputadu Asembleia Konstituente no Lider PDC, Antonio Ximenes. Foto, FB AX.

Breaking News
Typography

Dili-SMI, Eis Deputadu Asembleia Konstituente, Antonio Ximenes, hakerek karta aberta ba Prezidente Tribunál Rekursu – PTR, Deolindo dos Santos  atu desolve bankada CNRT, PLP no KHUNTO hodi hamosu bankada AMP iha Parlamentu Nasionál – PN tanba harii bankada ketak-ketak konsidera inkonstitusionál no viola rejimentu parlamentu nian.

“Hau observa didiak katak, desolve koligasaun AMP no FDD ne’e hamosu inkonstitusionál, tanba ne’e hau hakerek karta reklamasaun ida ne’e ba Sua Exelencia Prezidente Tribunál Rekursu, husu atu foti desizaun loloos kona-ba legalidade bankada CNRT, bankada PLP, bankada KHUNTO, bankada UDT, bankada FM no bankada PUDD iha parlamentu nasionál”, dehan Antonio Ximenes, iha karta aberta ne’ebé haruka ba Prezidente TR ne’ebé SMI asesu, Kuarta, (04/07).

Iha karta aberta ne’e, Antonio,  esplika rezultadu eleisaun antesipada koligasaun AMP no FFD, partidu FRETILIN no PD mak hetan asentu iha PN ne’ebé laiha razaun hodi dezolve koligasaun AMP no FDD hodi harii koligasaun ketak-ketak.

Lider Partidu Demokratiko Cristao – PDC ne’e aprezenta nia razaun ba prezidente TR katak tuir espiritu konstituisaun artigu 7 alinea 1, artigu 62, artigu 70 alinea 1 la fó espasu atu desolve koligasaun partidária ne’ebé establese antes eleisaun.

“Hanesan Sua Exelencia hatene, espiritu konstituisaun artigu 7 aline 1, artigu 62 no artigu 70 alinea 1 nian, fó sai momos katak koligasaun husi antes eleisaun nian, ne’e labele desolve”, dehan iha karta aberta ne’e.

Nia mós klarifika ninia razaun iha karta aberta ne’e,  CNRT, PLP no KHUNTO hetan asentu iha parlamentu ho koligasaun AMP, nune’e mós FM, UDT no PUDD liu bareira ho naran koligasaun FDD.    

Ho nune’e, nia esplika laiha dalan koligasaun AMP no FDD atu forma fali bankada keta-ketak iha PN. Maibe, presiza harii deit bankada hat mak hanesan bankada AMP, Bankada FDD, bankada FRETILIN no bankada PD.

Liu husi karta aberta ne’e, nia rekomenda ba prezidente Tribunál Rekursu atu haree didiak legalidade ba bankada CNRT, PLP, KHUNTO husi koligasaun AMP, no bankada FM, UDT no PUDD husi koligasaun FDD nian.

Eis Xefe Bankada Parlamentar Primeiru Lejizlatura ne’e konsidera estrutura V lejizlatura nomós estrutura VIII Governu konstitusionál ne’ebé boot demais bele lori dezastre boot ba nasaun nia futuru. Tanba aloka rekursu nasaun ne’ebé boot ba estrutura inklui mós la tuir valor konstituisaun RDTL.

Tuir SMI nia observasaun, kestaun forma bankada ketak-ketak husi koligasaun AMP no FDD ne’e sai asuntu diskusaun entre membru PN iha primeiru sesaun plenária V lejizlatura, iha loron 13 Juñu liu ba.

To’o notisia ne’e SMI públika seidauk konsege konfirma ho Prezidente Tribunál Rekursu kona-ba karta aberta refere. Nomós seidauk konfirma lider partidu koligasaun sira ne’ebé mensiona iha karta aberta ne’e rasik. (Editor, Lariwa).

fShare
0
Pin It

Follow us on Twitter

Sign up via our free email subscription service to receive notifications when new information is available.