Dili-SMI, VIII Governu Konstitusionál liu husi reuniaun Konsellu Ministru-KM aprova proposta Ministériu Finansa hodi foti osan hosi fundu petrolífera hamutuk $.140 milloens atu nune’e bele finansia makina Estadu.
“Konsellu Ministru aprova proposta hosi Vise Ministra Finansas nian, kona-ba Governu husu autorizasaun estraordinária ba Parlamentu Nasional atu foti osan hosi Fundus Mina-Rai nian $140 milloins ba kofre estadu atu funsiona mákina estadu hodi hein OGE em vigor”, dehan Komunikadu Imprensa husi Gabinete Primeiru Ministru ne’ebé SMI asesu, Kuarta, (11/07).
Iha reuniaun Konsellu Ministru ne’e mós aprova proposta Ministériu Negósiu Estranjeiru no Kooperasaun kona-ba atu apoiu doasaun hamutuk $.50 Mill anualmenta reprezentante Permanente Repúblika Sarauí iha Timor-Leste.
“Konsellu Ministru aprova Rezulusuan Governu nian ne'ebe proposta hosi Ministru Negósiu Estranjeiru no Kooperasaun atu fó donativu $50 mill anualmente hodi sustenta ba sutentabilidae Reprezentante Permanente Repúblika Sarauí nian iha Dili”, esplika komunikadu ne’e.
Desizaun VIII Governu hodi fó apoiu ne’e relasiona ho istória pasadu kona-ba sira luta ba auto-determinasaun povu Timor-Leste nian. Maske nune’e, apoiu ne’e sei aplika wainhira Orsamentu Jerál Estadu Aprova ona. (Editor, Lariwa).