Dili-SMI, Prezidente Conselho de Imprensa de Timor-Leste - CI-TL, Virgílio da Silva Guterres, preokupa tebes ho empase polítika ne’ebé dadaun akontese iha rai-laran fó impaktu negativu ba publikasaun mídia nasionál sira no jornalista sira lakon serbisu.
Durante Konferensia Imprensa ne’ebé hala’o iha edefisiu CI, Sesta (3/8), Prezidente CI, Virgílio hateten Impase polítika dadauk ne’e afeita tebes vida setór hotu-hotu iha país ne’e, tantu setór públiku ka setór privadu. Konsidera political deadlock ne’e ekonomikamente implika mós ba funsionamentu kanál mídia sira nia publikasaun iha railaran.
Tuir Virgílio, implikasaun boot husi empase polítika iha rai-laran mak jornál balu tenke hemenus númeru jornalista husi sira nia serbisu. Nomós jornalista husi mídia imprime hanesan Diáriu Timoroman lakon sira nia serbisu tanba jornál taka ona temporariamente relasiona ho laiha orsan atu selu jornalista sira.
“Faktu impíriku hatudu katak kompaña iha railaran barak mak depende ba projetu setór públiku nian, ho liafuan seluk kompaña barak mak depende ba projetu governu nian. Entau, bainhira instabilidade polítika akontese, laiha orsamentu estadu nian mak aloka ba projetu hirak ne’e, klaramente ida-ne’e efeita direta ba kresimentu ekonómiku kompaña sira nian,” Tenik eis Prezidente Asosiasaun Jornalista Timor Lorosa’e – AJTL ne’e.
Nia hatutan, situasaun empase polítika ne’e mós fó impaktu boot ba kompaña mídia sira tamba instituisaun Estadu nian barak mak seidauk selu sira nia jornál.
“Tinan barak nia laran kuaze kanál mídia hotu-hotu depende mkaas ba publisidade instituisaun governu nian. Ho situasaun ida-ne’e governu la tau ona sira nia publisidade ka iklan iha kanál mídia sira iha railaran. Konsekuensia husi situasaun ekonómika ne’e mak rendimentu kanál mídia sira ne’e tu’un (drop),” nia esplika.
Antes remata, Atual Prezidente CI ne’e esplika dadauk ne’e buka hela dalan hamutuk ho diretór no mídia-na’in sira atu buka solusaun, nune’e situasaun ekonómika ne’e labele kontinua afeita no implika funsionamentu kanál mídia nian, liu-liu ba bem-star jornalista ho nia familia sira. (Editor, Mateus Barros).