Dili-SMI, VIII Governu to'o ohin loron seidauk selu kompaña Esperansa Timor Oan – ETO no SACOM ne’ebé durante ne’e fornese mina ba sentral eletrika Hera no Betano hamutuk $.39 milloes.
“Ita iha SACOM ho ETO, kompaña rua ne’e mesak timor hotu, ida fornese mina ba Betano ida fornese mina ba Hera. ETO mak fornese hela (mina) nia tusan ne’e iha governu, iha $33 milloens seidauk selu. SACOM nian iha $.6 milloens seidauk selu”, dehan Diretúr Produsaun Eletrisidade de Timor-Leste – EDTL Comoro, Inacio de Jesus Leite, Kinta, (09/08), foin lalais ne’e.
Inacio esplika, durante ne’e kompaña ETO mak sei kontinua fornese mina ba sentral eletriku Hera maibe kompaña SACOM hapara ona fornesementu mina ba sentral eletriku Betano hahu iha loron 25 fulan Juñu liu ba.
“ETO mak sei fornese nafatin, SACOM mak para oan dezde 25 de Juñu. Ami para ona jerador walu (8) iha Betano, la funsiona. Agora dadauk sentral Hera mak funsiona fornese ahi ba timor laran tomak”, dehan diretúr ne’e.
Atu antisipa hodi labele akontese eletrisidade mate, parte EDTL kordena ona ho kompañia ETO hodi buka solusaun ba problema refere. Maibe, nia hatutan, rezerva mina ne’ebé dadaun iha sentral eletriku Hera sei bele fornese ahi to’o deit loron 21 fulan Agostu tinan ida ne’e, no liu ida ne’e teritoriu laran sei nakukun tanba laiha ona mina atu fornese populasaun.
“Ami kordena ho kompaña ETO katak iha dia 21 de Agusto, tuir hanesan sira ne’ebé jestaun iha sentral Hera ba manutensaun operasaun, iha liña kordensaun katak dia 21 ne’e mina ne’ebé foin dadauk fornese bele hotu, ita sei la fornese tan mak ahi bele mate iha timor laran”, tenik Inacio.
Ho situasaun ne’ebé EDTL infrenta, responsavél EDTL Komoro ne’e husu ba Governu atu selu lalais tusan ba kompaña ETO no SACOM hodi nune’e bele evita ahi mate iha teritoriu laran.
“Ami teknikamente ami halo buat sira ne’e, ami husu ba na’i ulun sira rezolve hodi selu lalais tusan sira ne’e, ne’e hanesan tusan bo’ot ida mai ami, hanesan kompañaa sira la fornese ona ne’e tenki ahi mate”, katak nia.
Iha parte seluk, Deputadu Komisaun E Parlamentu Nasionál, Abel Pires, hetete, problema ne’ebé dadaun ne’e EDTL infrenta nu’udar problema kiik ne’ebé VIII Governu sei rezolve hodi evita ahi mate iha teritoriu laran.
“Hau bele informa ba publiku katak situsaun ida ne’e, situasaun ne’e hanesan problema kiik oan, tanba ita iha osan, ita iha problema jestaun ita bele resolve iha tinan ida ne’e nia laran bele garante ida ne’e ahi sei la mate. Suplay sei kontinua, osan sei selu. VIII governu mosu rezolve ida ne’e duni, AMP mosu atu rezolve ita nia sitiuasaun hirak ne’e”, dehan nia.
Deputadu husi Partidu Libertasaun Popular – PLP ne’e argumenta katak, Komisaun E sei esforsu hodi koalia ho kompaña ETO no SACOM hodi nune’e bele kontinua garante fornesementu ahi ba públiku, liu-liu komunidade iha nasaun ida ne’e.
Tanba, nia haforsa, wainhira ahi mate mak sei prejudika ba atividade negosiu komunidade, labarik sira nia estudu iha eskola, serbisu doutor sira hodi salva pasiente sira iha hospital inklui atividade makina estadu nian.
To’o notisia ne’e SMI públika seidauk konfirma direta ho diretúr kompaña ETO no SACOM kona-ba asuntu ne’ebé relasaun ho tusan refere. (Editor, Lariwa).
