24
Sat, Feb
0 New Articles

Lere Anan: Komandante Postu Tunubibi Bele Sai Husi F-FDTL

Breaking News

Dili-SMI, Relasiona ho kazu tiru malu entre membru polísia no milítar foin lalais ne’e, Xefe Estadu Falintil-Forsa Defeza Timor Leste – FDTL, Maijor Jenerál, Lere Anan Timur, esplika, wainhira rezultadu investigasaun identifika involve iha kazu tiru malu mak komandante postu Tunubibi, Kapitaun Costa bele hetan demisaun husi instituisaun.

“Hau puni kedas komandante postu Tunubibi, kapitaun Costa, fó detensaun ba nia,  nia agora dadaun nia iha hela sela Polisia Militar.  Ne’e punisaun ida ba ofisiál ida ke todan, to’o momentu ida prosesu remata nia  envolvidu, nia kareira mate”, Dehan Maijor Jenerál, Lere Anan Timur, hafoin hasoru malu ho Prezidente-da-Repúblika, iha Palásiu Prezidensiál Aitarak-Laran, Kuarta, (15/08).

Lere deklara ba públiku katak, dadaun ne’e, komandate postu Tunubibi detein hela iha sela Polisia Militar hodi hein prosesu legál tuir lei haruka.

“Hau hakarak esklarese ba politiku sira, ba ONG sira, ba komunidade sira katak komandante postu Tunubibi Kapitaun Costa, fó detensaun ba nia, nia agora dadaun nia iha hela sela Polisia Militar”, dehan Lere.

Lere afirma, prosesu investigasaun ba komandante Tunubibi agora dadaun la’o hela no Komandu F-FDTL sei foti dezisaun wainhira wainhira simu ona rezultadu investigasaun kona-ba kazu Maliana refere.

Tuir Lere Anan, desizaun punisaun ne’ebé komandu F-FDTL foti konsidera hanesan punisaun todan hasoru kapitaun Costa tanba wainhira rezultadu investigasaun identifika involve iha kazu tiru malu mak sei sai husi instituisaun militár nian.

Eis komandante FALINTIL iha zona Ponta Leste ne’e mós esplika, desizaun ne’ebé nia sei fóti sei bázea ba relatóriu rezultadu investigasaun nian.

Nia hatutan, karik rezultadu investigasaun ne’e indika kazu displinar mak sei foti desizaun tuir lei milítar nian, maibe karik kazu ligadu ho krime mak sei haruka ba tribunál hodi tuir prosesu legál nian.

Tan ne’e, fundador nasaun ne’e husu ba públiku atu pasensia hodi hein prosesu investigasaun to’o remata. No, wainhira konklui ona prosesu investigasaun mak instituisaun polísia no militár sei tun direta ba Maliana hodi husu deskulpa ba komunidade relasiona ho erru ne’ebé akontese foin lalais ne’e.

Fundasaun Mahein – FM hanesan sosiadade sivil ne’ebé halo monitorizasaun ba asuntu defeza no seguransa dala-barak ona fó atensaun ba membru instituisaun polísial no militár atu uza armas tuir prosedementu ne’ebé loos. Maibe, realidade kazu konfrontu fisiku no uza armas entre membru nstituisaun polísial no militár kontinua akontese to’o ohin loron

Tuir observasaun SMI hatudu katak, dezde Timor-Leste hetan ninia independensia dala-barak ona mosu kazu tiru malu entre membru polísia no militár ne’ebé hamosu paniku iha públiku. (Editor, Lariwa).

Pin It

Follow us on Twitter

Sign up via our free email subscription service to receive notifications when new information is available.