Dili-SMI, VIII Governu konstitusionál liu husi orientasaun Primeiru Ministru, Taur Matan Ruak, ba ekipa konjunta Ministériu Obras Públikas - MOP no Ministériu Finansa – MF atu kobra orsan husi ministériu seluk hodi tau hamutuk selu tusan ETO ho
totál $.33 milloens ne’ebé Governu deve hela.
Tuir Ministru Obras Públikas, Salvador Eugénio Soares dos Reis Pires, durante fulan rua nia-laran hahú husi fulan-Jullu to’o Agostu, Ministériu Obras Públikas buka hodi rezolve dívidas husi kompañia fornesedór sira nian, inklui ETO nian hamutuk Millaun $ 30 resin.
“Horseik (16/08) kedas Primeiru Ministru orienta ona ekipa konjunta, Ministeriu Finansas no Ministériu Obras Públikas tenta atu akumula orsamentu oituan-oituan husi ministériu seluk atu tau hodi selu ba ETO. Nune’e ETO bele garante fornese konbustível para ita kontinua fornese eletririsidade ba povu tomak, ha’u fiar katak ami hetan ona solusaun no iha dia 21 Agostu ahi sei la mate”, dehan MOP, ba jornalista sira iha nia serbisu fatin, Kaikoli, Sesta, (17/08).
Tuir Ministru Salvador, dadaun ne’e iha ona orsamentu hamutuk $.2.6 milloens ne’ebé submete ona despasu ba Ministériu Finansa iha loron (17/08) atu halo pagamentu ba kompaña ETO.
“Ita iha osan uitoan duni 2.6 Milloens, ohin duni (Red-Sesta, (17/08) ami hasai ona despasu ba ita-nia diresaun finansas para atu halo pagamentu lalais 2.6 Milloens ba ETO,” esplika ministru ne’e.
Iha parte seluk, Salvador Pires, hatutan, Governu tau ona orsamentu hamutuk $. 1.3 Millaun atu selu kompaña internasionál WARTSILA ne’ebé durante ne’e fornese mina ba jerador sira EDTL nian.
Governante ne’e afirma, dívidas restu ne’ebé sei hela, ekipa konjunta husi Ministériu Obras Públikas no Ministériu Finansas kontinua buka hodi halo pagamentu para asegura fornesimentu konbustível ba jeradór sira, nune'e kontinua fornese ahi eletrisidade ba povu tomak.
Antes ne’e, iha loron (09/08), Diretúr Produsaun Eletrisidade de Timor Leste – EDTL Comoro, Inacio de Jesus preokupa tanba Governu seidauk selu tusan kompaña mina ETO no SACOM hamutuk $.33 milloens.
“Ita iha SACOM ho ETO, kompaña rua ne’e mesak timor hotu, ida fornese mina ba Betano ida fornese mina ba Hera. ETO mak fornese hela (mina) nia tusan ne’e iha governu, iha $33 milloens seidauk selu. SACOM nian iha $.6 milloens seidauk selu”, dehan Diretúr Produsaun Eletrisidade de Timor-Leste – EDTL Comoro, Inacio de Jesus Leite, Kinta, (09/08), foin lalais ne’e.
Inacio esplika, durante ne’e kompaña ETO mak sei kontinua fornese mina ba sentral eletriku Hera maibe kompaña SACOM hapara ona fornesementu mina ba sentral eletriku Betano hahu iha loron 25 fulan Juñu liu ba. (Editor, Lariwa).