Ermera-SMI, Rezultadu husi inspesaun gabinete Sekretáriu Estadu Ambiente – SEA iha loron 27 Augostu foin lalais ne’e, identifika katak atividade empreza Gracia Farm ne’ebé hakiak manu buras iha postu Administrativu Railaku, Munisipíu Ermera estraga meiu ambiente iha area refere.
Tuir Sekretáriu Estadu Ambiente, Deometrio de Carvalho, inspesaun ne’ebé ninia gabinete halo ba empreza Gracia Farm nu’udar asaun Governu hodi kontrola kestaun ambientál ne’ebé sai preokupasaun komunidade iha area Railaco.
“Inspesaun ne’e hanesan asaun ida hodi hatene loloos kestaun ambientál ne’ebé relasioan ho komunidade balun mai hato’o keixa iha Sekretária Estadu Ambiente semana hirak liu ba. Katak empreza refere la organiza diak kona-ba lixu no manu ten hodi fo impaktu ba iha area refere”, dehan Deometrio, liu husi komunikadu imprensa ne’ebé SMI asesu, Tersa, (28/08).
Deometrio esplika, durante inspesaun nota katak iha duni problema ambientál iha area hakiak manu buras residu hanesan solidu mak manu teen, hahan restu, kaixa karon aat sira no mós residu likuido mak, bee foer husi manu luhan no polusaun husi fermentasaun manu teen no hahan restu sira, residu Farmaseutica saringan animal nian, vaksin no vitamin sira.
Bázea ba rezultadu inspesaun ne’e, Governu liu husi SEA bolu atensaun ba empreza Gracia Farm atu rezolve problema ambientál iha area refere.
“Iha inpesaun ne’e Sekretária Esatdu fó rekomendasaun ba empreza refere hodi esforsu diak liu tan atu halo mitigasuan ba problema ambientál ne’ebé mosu iha fatin refere”, dehan nia iha komunikadu ne’e.
Eis Diretúr Haburas ne’e mós rekomenda ba empreza Gracia Farm atu hadi’a sistema iha kolam hodi hamenus risku ba ambientál, modifika mekanizmu fó hemu manu sira ho sistema automatiku hodi poupa bee no hamenus produsaun bee foer iha fatin hakiak manu nian.
Nia hatutan, presiza hamoos no halibur foer manu teen hosi manu luhan ho regularmente no tenke taka ho lona hodi evita polusaun hosi efeitu fermentasaun ka dois iha area produsaun hakiak manu buras refere.
“Hamoos no halibur foer hosi manu luhan regularmente no koloka iha fatin ne’ebé taka ho kapa ka lona hodi hamenus polusaun, efeitu fermentasaun ka dois”, katak nia.
Antes remata, eis ativista verde ne’e mós husu ba empreza Gracia Farm atu kuda haleu manu luhan hodi filtra sirkulasaun nnin, dezenvolve insinerator ki’ik ida ba trata residu farmaceutika sira. Nomós dezenvolve resiklazen surat tahan kaixa ba manu tolun fatin hodi nune’e labele estraga ambiente iha area refere.
Empreza Gracia Farm hahu nia atividade iha Postu Administrativu Railaku, Munisipíu Ermera ho lisensa katégoria C maibe iha 2014 atutoridade Ambiente reklasifikasuan ba atividade refere nee ho lisensa katégoria B.
To’o notísia públika SMI seidauk kontaktu ba parte empreza Gracia Farm hodi klarifika kona-ba rezultadu inspesaun Governu nian. (Editor, Lariwa).
