24
Sat, Feb
0 New Articles

Tarde Promúlga OJE 2018, Governu Sei Hetan Krize Finanseiru

Primeiru Ministru, Taur Matan Ruak. Foto, Arkiva SMI.

Breaking News

Dili-SMI, Wainhira Prezidente-da-Repúblika tarde promúlga Orsamentu Jerál Estadu – OJE 2018 mak VIII Governu Konstitusionál sei hetan krize finanseiru iha fulan Setembru hodi fasilita serbisu makina Estadu nian.

Primeiru Ministru VIII Governu Konstitusionál, Taur Matan Ruak, sente preokupa karik Xefe-de-Estadu, Francisco Guterres “Lú Olo” la promúlga lalais OJE 2018 ne’ebé Parlamentu Nasionál – PN  aprova iha loron 7 fulan Setembru 2018, ho votu afavor 42, Abstensaun 14 no kontra 9.

“Situasaun kritika oitoan ba iha fulan Setembru kona-ba ita nia rekursu finanseiru entaun depende maka’as  loos ba promúlgasaun orsamentu ne’ebé foin parlamentu aprova. Foin mak tama no sr prezindente estuda hela no hau mós husu karik nia promulgasaun ne’e lais oitoan diak liu”, dehan PM Taur, iha Palásiu Prezidensiál, Aitarak-Laran, Kinta, (13/09) hafoin hasoru malu ho Prezidente-da-Repúblika.

Atúal Primeiru Ministru, esplika, urjensía hosi promúlgasaun OJE 2018 ne’e importante tanba orsamentu refere prinsipál tebes atu apoiu funsionamentu makina Estadu tinan 2018 nian.

“Orsamentu ida ne’e krúsial loos para estabiliza difinitivamente ita nia tezouru nomós despezas  sira iha tinan 2018”, katak Eis Jenerál Fitun rua ne’e.

Taur komenta, OGE 2018 nu’udar parte determinadu rekopera krize finanseiru durante tinan 2018 no normaliza situasaun finanseiru iha tinan 2019.

Nune’e mós, iha loron Segunda, (10/09), PN submete ona proposta OJE 2018 nú 2/V (2a) ba Prezidente-da-Repúblika atu halo promúlgasaun.

Antes submete proposta OJE 2018, Prezidente PN, Arão Noe, esplika, PN iha dever no responsabilidade masimu hodi subemete proposta lei OJE 208 ne’ebé aprova iha finál globál ba Xefe-de-Estadu maibe atu promúlga ne’e la’os ninia kompeténsia.

“Hau bele asina, no kompremitidu atu lori ba Xefe-de-Estadu, atu promúlga ne’e kompeténsia órgaun seluk nian”, dehan nia.

Iha parte seluk, Xefe Kasa Sivil, Francisco Maria de Vasconselhos, iha loron Tersa, (11/09) klarifika ba públiku liuhosi mídia nasionál katak proposta OJE 2018 iha ona meja PR atu estuda antes halo promúlgasaun.

Tuir Lei iha loron tolu nolu ba Prezidente-da-Repúblika atu halo estuda kona-ba proposta lei OJE ante deside promúlga ka veta. (Editor, Lariwa).

 

 

 

Pin It

Follow us on Twitter

Sign up via our free email subscription service to receive notifications when new information is available.