Díli-SMI, Movimentu Kontra Okupasaun Tasi Timor – MKOTT husu Prokurador Jerál Federál Australia atu investiga eis Ministru Negosiu Estranjeiru, Alexandre Downer, kona-ba kazu espinonazen, ho razun kazu espionazen akontese iha periodu Downer no eis Primeiru Ministru Jhon Howard nia mandatu.
“MKOTT hakarak propoin ba Prokurador Jerál Federál Australia nian atu loke investigasaun ba eis Ministru Estranjeiru Sr. Alexander Downer ne’ebé mak agora dadaun ne’e tur hanesan kuadru konsellu Kompañia Woodside nian, ho razaun iha Alexander Downer nian mandatu hamutuk ho eis Primeiro Ministro John Howard mak kazu espionazen refere akontese”, dehan iha Komunikadu Imprensa ne’ebé SMI asesu, Segunda, (17/09).
Iha Komunikadu ne’e mós MKOTT konsidera akuzasaun tribunál Australia hasoru Bernard Collaery ho Witness K, nu’udar aktu halo moe an hanesan nasaun boot no kuiñesidu ne’ebé durante ne'e promove liberdade espresaun no demokratizasaun.
MKOTT mós konsidera akuzasaun ne’e nu’udar aktu Governu Australia hodi ameasa ema seluk ne’ebé hakarak deskobre Governu ninia polítika foer ba nasaun vizinu sira.
“MKOTT sente triste ba nasaun boot hanesan Australia ne’ebé kontinua han matak ba ninian vizinho sira. MKOTT hare’e liu husi akuzasaun ida ne’e governu Australia iha planu atu halo tauk ema barak mak hakarak deskobre governu Australia nian atetude ladiak hasoru ninia nasaun viziñu”, dehan Komunikadu ne’e.
Ho nune’e, MKOTT husu ba Tribunál Australia atu hapara akuzasaun hasoru Advogadu Bernard Collaery ho ninia kliente Witness K, no tuir lolos tribunál tenke asegura sasin sira no serbisu hamutuk hodi hasoru hahalok espionazen, la’o halo fali akuzasaun.
MKOTT fó apoiu ba inisiativa membru Parlamentu Australia na’in hat (4) ne’ebé hakarak loke fali prosesu investigasaun ba kazu espionazen mak halo hosi ASIO.
“Fó apoiu ba inisiativu hosi Sr. Andrew Wilkie MP, Senadór Nick McKim, Senadór Rex Patrick no Senadór Tim Storer membru Parlamentu Australia nian ne’ebé hakarak loke fali investigasaun ba iha kazu espionazen mak halo husi ASIO”, hakerek iha komunikadu ne’e.
MKOTT hato’o deklarasaun ba públiku iha loron (17/09) liuhosi Komunikadu Imprensa iha Embasada Australia iha Dili nia oin, wainhira entrega petisaun asinatura timoroan hamutuk ema na’in Rihun ida Atus Tolu resin ne’ebé fó apoiu solidariedade ba Bernard Collaery ho Witness K ba Embasador Autralia iha Timor-Leste.
MKOTT sei nafatin mobiliza asinatura hosi povu Timor-Leste hotu fó solidariedade ba Bernard Collaery ho Witness K ne’ebé sei entrega iha loron julgamentu 28 Outobru tinan ida ne’e.
Bernard Collaery no Witness K hetan akuzasaun hosi Tribunál Australia tanba fó informasaun Governu Australia ninia espionazen ne’ebé monta aparelu iha palasiu Governu Timor-Leste hodi akapta enkontru estratéjiku kona-ba negosiasaun Fronteira Maritima iha tinan 2014.
To’o notisia ne’e públika SMI seidauk konfirma ho parte Governu Australia liuhosi reprezentante embasada iha Timor-Leste.(Editor, Lariwa).