Díli-SMI, Prezidente-da-Repúblika, Francisco Guterres “Lú Olo” apela ba Parlamentu Nasionál - PN V Lejislatura atu harii lalais Komisaun Inkéritu Parlamentu hodi halo fiskalizasaun rigrozu ba projetu hamutuk 142 antes Governu selu.
“Parlamentu Nasionál hatán ona atu harii Komisaun Inkéritu Parlamentar hodi fiskaliza projetu sira antes atu selu, ha’u apela ba Parlamentu Nasionál atu harii lalais Komisaun ida ne’e, atu nune’e prosesamentu pagamentu hotu bele tuir dalan ne’ebé loos, ho transparénsia no rigor”, dehan Prezidente, Lú Olo, liuhosi ninia diskursu iha Palásiu Prezidensiál Aitarak-Laran, wainhira promúlga OJE 2018, Kinta, (27/09).
PR Lú Olo mós husu ba Governu no Parlamentu Nasionál bele konsidera no hadi’ak liu tan asuntu no regulamentu sira hodi nune’e bele define diak liu tan dispozisaun Lei Fundu Minarai no Lei Orsamentu no Finanseiru nian.
“Oinsá hadi’ak kestoens normativas ka regulamentar sira hodi artikula di’ak liután dispozisoens hosi Lei Fundu Minarai no Lei Orsamentu no Jestaun Finanseiru ne’ebé liga ho reseitas”, dehan Komandante Supremu Forsa Armada ne’e.
Durante diskursu, Xefe-de-Estadu mós kestiona kapasidade Governu iha nivél ezekusaun tanba konsidera prozesaun Orsamentu Jerál Estadu – OJE 2018 ne’ebé boot tebes.
Nune’e mós, Atúal Prezidente-da-Repúblika sente preokupa kona-ba alokasaun orsamentu ba area Saude no Edukasaun ne’ebé minimu tebes, kompara ho alokasaun orsamentu barak liu ba infra-estrutura hanesan Projetu Tasi Mane.
“Orsamentu Jerál Estadu ba tinan 2018 ida ne’e tau osan barak liu iha infraestruturas no ladun tau osan ba edukasaun no saúde. Ita kontinua haree osan tau makas iha projetu Tasi Mane ne’ebá maski ita rasik seidauk hatene loloos saída mak sei akontese ho Greater Sunrise”, dehan Eis Falintil ne’e.
Antes ne’e, (28/08) Primeiru Ministru, Taur Matan Ruak, afirma, Governu sei selu projetu sira ne’ebé finalizadu no tuir regra.
“Hau lakohi hasai orsan hosi hau nia bolsu para selu fali indisiplina ne’ebé komete hosi sidadaun sira. Tanba ne’e, Governu prontu atu selu maibe Governu mós hakarak fó klaru ba sosiadade hothotu tenke tuir regras”, dehan Xefe VIII Governu ne’e.
Atúal Primeiru Ministru ne’e mós konkorda atu harii Komisaun Inkéritu Parlamentar atu haree didiak projetu hirak ne’ebé tama iha OJE 2018 antes atu selu.
Iha loron hanesan (28/08), deputadu Partidu Demokrátiku – PD, Adriano do Nacsimento, durante diskusaun proposta OJE 2018 iha faze jeneralidade, husu ba PM atu labele selu projetu hamutuk 142 refere tanba konsidera ilegál.
Nia haktuir, tuir karta ne’ebé simu hosi Diretúr Grande Projetu iha loron 3 fulan Agostu 2017 indetifika katak projetu hamutuk 142 seidauk tama iha faze planeamentu orsamentál iha tempu refere. (Editor, Lariwa).
