Díli-SMI, Sekretáriu Jerál, Timor Leste Press Union – TLPU, Manuel Pinto “Caileq”, konsidera responsavél Grupu Media Nacional – GMN aplika hahalok ditadura no hamate libedade jornalista hodi involve iha oragnizasaun ruma relasiona ho kazu demite Xefe Redasaun, Francisco Belo Simões ne’ebé laiha razun klaru.
“Hau haree, aktus GMN sei hamate liberdade jornalista nian atu involve an iha organizasaun jornalista, nune’e bele konsidera “Ditadura Auténtiku”, Dehan Sekretáriu Jerál, TLPU, Manuel Pinto, deskreve iha ninia Facebook, (Segunda, (01/10) nu’udar espresaun solidariedade ba jornalista no Xefe Redasaun GMN ne’ebé hetan demisaun hosi ninia instituisaun mídia.
Lider TLPU, Manuel Pinto, konsidera karta demisaun hosi Diretúr Informasaun GMN, Francedes Suni, ne’ebé direji ba ninia Xefe Redasaun, Francisco Belo Simões, iha Kuarta, (27/09) nu’udar aktu forsada ne’ebé viola prosedementu legál no sistema administrativu nian.
Manuel haktuir, konteúdu karta hosi Diretúr Informasaun ne’ebé bázea ba orientasaun Prezidente Konsellu Administrasaun, Jorge Serano, katak, Francisco Simões, nu’udar jornalista ne’ebé kaer kargu iha GMN maibe barak liu foku atividade Konselu Imprensa kompara ho atividade iha GMN, tanba ne’e husu atu konsentra deit serbisu ka atividade Konsellu Imprensa nian.
“Nu’udar jornalista Francisco ne’ebé ka’er kargu Xefe GMN Presiza Nia atensaun no Focus, Tanba kargu iha konsellu Imprensa, Francisco la bele fokus iha GMN, tanba ne’e hahú loron 1 Outubru, GMN husu Francisco konsentra de’it iha atividade Konsellu Imprensa, la bele kontinua nia servisu iha GMN”, haktuir, Atúal Jornalista TATOLI ne’e.
Relasiona ho situsaun ne’ebé jornalista Francisco hasoru, Ezekutivu TLPU, Manuel Pinto, konsidera asuntu sériu no promete sei organiza maluk jornalista sira hodi fó sira nia solidadriedade hodi kontra aktu GMN ne’ebé hahu hamate jornalista nia liberdade hodi involve iha organizasaun jornalista nian.
Iha parte seluk, Francisco Simões, ne’ebé hetan demisaun hato’o ona nian karta klarifikasaun ba Prezidente Konsellu Administrasaun GMN, Jorge Manuel de Araújo Serrano, iha loron Kinta, (28/09) nu’udar auto defeza ba desizaun ezekutivu GMN hasoru nia ne’ebé mensiona nia la foku serbisu iha GMN.
“Ha’u hakarak klarifika ho honestidade katak, hau la haree hetan GMN nia indikador ne’ebé bele komprova mai hau katak, hau la fokus servisu iha GMN. Tanba durante ne’e, hau halao hela hau nia obrigasaun hanesan Xefe Redasaun hodi kumpri orientasaun hotu husi hau nia superior sira”, dehan Francisco.
Iha karta ne’e, Francisco, klarifika ba Prezidente Konsellu Administrasaun GMN, durante ne’e sempre hala’o ninia knár tuir orden no desizasaun hosi superior sira relasiona ho serbisu ne’ebé tutela ba nia.
“Presiza hau klarifika liu tan katak, nu’udar xefi redasaun, sa oras deit iha momentu ne’ebé deit, kuandu hau nia superior sira hanesan Prezidenti Konsellu Administrasaun GMN, Corporate General Manager Holding, ho mos Diretór Informasaun, wainhira kontaktu hau relasiona ho servisu news room nian, hau sempre prontu, mesmu kalan boot”, dehan nia iha karta ne’e.
Iha karta klárifikasaun ne’e, nia afirma prontu no simu desizaun hosi GMN wainhira hakarak demite duni, maibe presiza hetan kompensasaun ne’ebé justu nu’udar traballador ida tuir Lei Traballador no Lei sira seluk iha rai-laran.
“Se GMN hakarak duni hasai hau ne’ebé justu kauza la iha, no mos viola Lei ba Traballu, Lei Komunikasaun Social no mos viola hau nia naran diak. Hau so husu kompensasaun ne’ebé justu”, dehan nia.
Tuir observasaun SMI, kazu demisaun jornalista Francisco Simões Belo ne’ebé atúal nu’udar membru Konsellu Imprensa sai diskusaun namanas entre jornalista sira iha mídia sosiál liu-liu facebook.
To’o notisia ne’e públika SMI seidauk halo konfirmasaun ba parte Ezekutivu GMN hanesan Diretúr Informasaun GMN, Prezidente Konsellu Administrasaun GMN kona-ba kestaun refere. (Editor, Lariwa).