20
Wed, Feb
5 New Articles

Prezidente GMN Demite Membru Conselho Imprensa

Membru Conselho Imprensa, Francisco Belo Simões. Foto, CI.

Breaking News
Typography

Díli-SMI, Prezidente Konsellu Administrasaun Grupo Media Nacional – GMN, Jorge Manuel de Araújo Serrano, demite ka hasai membru ida hosi Conselho de Imprensa de Timor-Leste – CI-TL, Francisco Belo Simões, ne’ebé atúal nu’udar Xefe Redasaun iha GMN.

Demisaun ne’e bázea ba karta hosi Diretúr Informasaun GMN, Francedes Suni, ne’ebé haruka ba Francisco Simões, iha loron, Kuarta, (27/09) báze ba orientasaun hosi Prezidente Konsellu Administrasaun GMN, Jorge Serrano.

Konteúdu karta hosi karta demisaun ba Francisco Simões, nu’udar jornalista ne’ebé kaer kargu iha GMN maibe barak liu foku ba atividade Conselho Imprensa kompara ho atividade iha GMN,  tanba ne’e husu atu konsentra deit serbisu ka atividade Konsellu Imprensa nian.

“Nu’udar jornalista Francisco ne’ebé ka’er kargu Xefe GMN Presiza Nia atensaun no Focus,  Tanba kargu iha konsellu Imprensa, Francisco la bele fokus iha GMN, tanba ne’e hahú loron 1 Outubru, GMN husu Francisco konsentra de’it iha atividade Konsellu Imprensa, la bele kontinua nia servisu iha GMN”,  haktuir, Sekretáriu Jerál, Timor Leste Press Union – TLPU, Manuel Pinto, Segunda, (01/10) iha ninia pájian facebook.

Relasiona ho kazu demisaun ne’e,  Ezekutivu TLPU, Manuel Pinto, konsidera asuntu sériu no promete sei organiza maluk jornalista sira hodi fó sira nia solidadriedade hodi kontra aktu GMN ne’ebé hahu hamate jornalista nia liberdade hodi involve iha organizasaun jornalista nian.

Lider TLPU, Manuel Pinto, konsidera karta demisaun hosi Diretúr Informasaun GMN, Francedes Suni, ne’ebé direji ba ninia Xefe Redasaun, Francisco Belo Simões, iha Kuarta, (27/09) nu’udar aktu forsada ne’ebé viola prosedementu legál no sistema administrativu nian.

Iha parte seluk, Francisco Simões,  ne’ebé hetan demisaun hato’o ona nian karta klarifikasaun ba Prezidente Konsellu Administrasaun GMN, Jorge Manuel de Araújo Serrano, iha loron Kinta, (28/09) nu’udar auto defeza ba desizaun ezekutivu GMN hasoru nia ne’ebé mensiona nia la foku serbisu iha GMN.

“Ha’u hakarak klarifika ho honestidade katak, hau la haree hetan GMN nia indikador ne’ebé bele komprova mai hau katak, hau la fokus servisu iha GMN. Tanba durante ne’e, hau halao hela hau nia obrigasaun hanesan Xefe Redasaun hodi kumpri orientasaun hotu husi hau nia superior sira”, dehan Francisco.

Eis jornalista no Xefe Redasaun STL ne’e mós afirma prontu no simu desizaun hosi GMN wainhira hakarak demite duni,  maibe presiza hetan kompensasaun ne’ebé justu nu’udar traballador ida tuir Lei Traballador no Lei sira seluk iha rai-laran.

“Se GMN hakarak duni hasai hau ne’ebé justu kauza la iha, no mos viola Lei ba Traballu, Lei Komunikasaun Social no mos viola hau nia naran diak. Hau so husu kompensasaun ne’ebé justu”, dehan nia.

Atúal membru CI ne’e, klarifika ba Prezidente Konsellu Administrasaun GMN, liuhosi karta klarifikasaun katak durante ne’e sempre hala’o ninia knár tuir orden no desizasaun hosi superior sira relasiona ho serbisu ne’ebé tutela ba nia.

“Presiza hau klarifika liu tan katak, nu’udar xefi redasaun, sa oras deit iha momentu ne’ebé deit, kuandu hau nia superior sira hanesan Prezidenti Konsellu Administrasaun GMN, Corporate General Manager Holding, ho mos Diretór Informasaun, wainhira kontaktu hau relasiona ho servisu news room nian, hau sempre prontu, mesmu kalan boot”, dehan nia iha karta ne’e.

Tuir observasaun SMI, kazu demisaun jornalista Francisco Simões Belo ne’ebé atúal nu’udar membru Konsellu Imprensa sai diskusaun namanas entre jornalista sira iha mídia sosiál liu-liu facebook. Maioria jornalista ladun sastifas ho desizaun, nomós fó korajen ba Francisco atu forsa hasoru dezafiu sira ne’e.

To’o notisia ne’e públika SMI seidauk halo konfirmasaun ba parte Ezekutivu GMN hanesan Diretúr Informasaun GMN, Prezidente Konsellu Administrasaun GMN kona-ba kestaun refere. (Editor, Lariwa).

fShare
0
Pin It

Follow us on Twitter

Sign up via our free email subscription service to receive notifications when new information is available.