Díli-SMI, Vise Prezidente Parlamentu Nasional PPN, Maria Angelina Sarmento, esplika, parte PN sei kontinua mantein pozisaun hodi sosa kareta foun ba membru deputadu V lejizlatura maske Movimentu Universitariu Timor-Leste – MUTL ameasa atu halo asaun demonstrasaun.
Maria Angela, hateten, membru PN iha diretu atu hetan kareta foun hodi uza ba atividade fiskalizasaun iha báze. No, husu ba MUTL no públiku labele haree de’it membru PN hamutuk ema na’in 65 ne’e maibe mós haree diretor no diretora lubuk ida hosi ministériu ne’ebé uza kareta marka prado.
“Deputadu ne’e eleitu pelu direitamentu hosi povu, saida mak nia labele iha direitu ba ida ne’e, enkuantu nia papél ida mak atu ba baze halo fiskalizasaun, entaun dala ruma públiku haree de’it mak deputadus na’in 65, maibé sura took diretores sira iha ministériu hot-hotu iha direitores hira, i direitores sira ne’e uza kareta marka saida? dala ruma públiku la haree diferensa didiak”, dehan Maria Angelina, iha Uma Fukun PN, Tersa, (23/10)
Eis Diretora FONGTIL ne’e esplika, planu MUTL atu hala’o asaun ka manifestasaun hasoru parmentu ne’e diretu fundamentu ne’ebé konsagra iha konstituisaun ne’ebé garante diretu liberdade ba espresaun.
Maibe, nia hatutan, desizaun Prezidente Parlamentu Nasional, Arão Noe Amaral sei la muda no kontinua sosa kareta foun hodi fasilita membru V lejizlatura nia atividade fiskalizasaun nian.
“Sekarik ba desizaun sira ne’ebé universitariu sira halo asaun manifestasaun hasoru parlamentu karik ne’e tuir lei ne’ebé iha, ema hotu iha direitu tomak ba liberdade de espresaun ne’ebé hakarak hato’o saida mak sira hanoin, maibé desizaun ne’ebé PPN foti sei nafatin ka mantein atu sosa kareta prado ba deputadus sira hodi uja ba servisu”, katak Angelina.
Deptutada hosi bankada Partidu Libertasaun Popular – PLP ne’e, klarifika, sei sosa uluk kareta hamutuk 48 ho estimasaun orsamentu hamutuk millaun ida atus hitu ($.1,700,00) no restu sei sosa ikus hodi kompleta ba membru deputadu hamutuk ema na’in 65.
“48 kareta ne’e orsamentu kuaze hamutuk kuaze milaun ida atus hitu $ 1.700.00), signifika katak sosa kareta foun ne’e fazeadamente la’os dala ida deit, la’os 65 kareta ne’e sosa dala ida deit”, dehan nia.
Iha parte seluk, porta-voz MUTL, Jones Chege, kontra desizaun Prezidente Parlamentu Nasional, Arão Noe, ne’ebé deklara iha fulan Juñu atu sosa kareta foun ba membru PN hodi fasilita serbisu fiskalizasaun nian.
Porta-voz ne’e fó razaun katak, MUTL nia pozisaun kontra desizaun PN hodi sosa kareta tanba konsidera desizaun polítika PN nian la reflete povu nia moris, reflete de’it deputadu sira nia interese privadu.
“MUTL hanesan sumbriña ida ne’ebé akumula hosi estudantes, juventude inklui povu Timor-Leste tomak hamrik hodi tuba ba defende direitu povu nia katak MUTL sei la hatan signifika’’lae’’ ba kualker desizaun ida ne’ebé mak orgaun soberanu sira ka elite polítika sira foti maibé la reflete ba povu nia moris”, dehan Jones.
Jones afirma, MUTL rejeita totál desizaun lider V lejizlatura kona-ba sosa kareta foun ba membru PN sira tanba konsidera desizaun ne’e hanesan hahalok prátika korupsaun ba povu no nasaun nia orsan. (Editor, Mateus Barros).