Díli-SMI, Deputada hosi bankada Partidu Kmanek Haburas Unidade Nasional Timor Oan-KHUNTO, Olinda Guterres, sadik Movimentu Univesitariu Timor-Leste – MUTL atu lori kaixaun hamutuk 65 tuir totál membru V lejizlatura wainhira halo asaun.
“Hau hakarak ko’alia mós katak alin oan sira ne’ebé ko’alia katak ami prontu fakar ran ami prontu mate, ida ne’e ba ita deputadu na’in 65 ne’e lalika hakfodak, tamba ran fakar ne’e liu tiha ona, bele karik hola kaisaun 65 ho ita 65 nia foto para sira sunu lilin”, dehan deputada Olinda Guterres, iha Parlamentu Nasional, Segunda, (29/10).
Tuir Olinda, MUTL labele lori de’it kaixaun Prezidente PN ho nia Vise Prezidente maibe diak liu lori kaixaun 65 tanba sosa kareta prado ne’e desizaun polítika hosi deputadu no deputada hamutuk ema na’in 65 iha PN.
“Hau hakarak ko’alia kona-ba sunu lilin, kaixaun ne’ebé tau Prezidente Parlamentu ninia foto no Vise Prezidente Parlamentu nia foto iha ne’eba, hau hanoin sira na’in rua mesak ne’e laloos, tamba ida ne’e desizaun polítiku husi deputados 65”, dehan deputada ne’e.
Maske nune’e, deputadu hosi bankada partidu Demokrátiku – PD, Antonio da Conçeicão, kontra ho deputada bankada KHUNTO no lakohi tahu nia fotográfia iha kaixaun wainhira MUTL halo asaun.
Eis Ministru Edukasaun ne’e mós konsidera MUTL ne’ebé lori kaixaun no sunu lilin durante asaun demonstrasaun nu’udar aktu la-respeitu ema no laiha étika morál.
“Hau sei la aseita hanesan deputada Olinda husi bankada KHUNTO hodi dehan katak tau ita na’in 65 nia kaixaun, hau nian hasai no labele, mais hau mós kontra aktus sira hanesan ne’e desrespeita pessoa humanu, ida ne’e estudante tenke buka hatene saida mak morál étika la’os liberdade de abuzu, hau solidariza tebes ba hahalok hanesan ne’e”, dehan nia.
Eis kandidatu Prezidente-da-Repúblika ne’e mós argumenta, la’os ona tempu atu halo kondenasaun abuzivu ba ema seluk nia integridade pesoál maibe oinsa rezolve problema ho aprosimasaun ne’ebé ho umanizmu.
Iha parte seluk, Prezidente Parlamentu Nasional – PPN, Arão Noe Amaral, hateten, nia ho ninia Vise Maria Angelina Sarmento, la preokupa ho Movimentu Universitariu Timor-Leste – MUTL ne’ebé tau sira nia foto iha kaixaun no sunu lilin durante asaun demonstrasaun.
Tuir PPN, Aão Noe, distinu ema hotu-hotu iha maromak nia liman maibe importante mak desizaun atu sosa prado ba membru V lejizlatura nu’udar desizaun koletiva, la’os sira na’in rua nia desizaun mesak.
“Ba hau ho vise ami nein sente preokupa kona-ba lilin ka kaisaun ne’e, ami entrega ba distinu maromak nia liman, ita hotu depende ba iha leten ás ba, importante mak desizaun ne’e koletivu ba parlamentu nian, la’os ba ami nain rua nia interese”, dehan Arão Noe.
Durante asaun MUTL iha loron Sexta, (26/10) semana kotuk, demonstrante sira lori kaixaun ida hodi taka fotográfia PPN, Arão Noe, Vise PPN, Maria Angela Sarmento, hamutuk ho kruz ne’ebé hakerek naran no liafuan Rest in Peace – RIP (Editor, Mateus Barros).
