Díli-SMI, Reprezentante hosi Movimentu Universitariu Timor-Leste – MUTL iha loron tersa, (06/10) foin lalais ne’e halo ona audénsia ho membru Parlamentu Nasional – PN ne’ebé lidera hosi Prezidente PN hodi diskute kontinua ka kansela sosa kareta prado ba membru V lejizlatura nian.
Kordenador MUTL, Noe Bernadinho, hateten, apresia ba lider PN ne’ebé simu ona sira nia pedidu audénsia ne’ebé konsege realiza hodi diskute kona-ba sosa kareta foun ba membru PN ka lae.
“Ami agradese ba komitmentu hosi ita nia Prezidente parlamentu nasional, Arão Noe de Jesus Amaral, inklui ho nia xefe gabinete ne’ebé mak kolabora atu nune’e iha vontade hamosu audénsia entre ami ho xefe bankada hosi partidu hotu, atu diskuti distinu (sosa kareta) ba membru parlamentu nasional, ne’e ami apresia”, dehan kordenador MUTL, Noe Bernadinho, hafoin remata audénsia iha PN, Tersa, (06/11).
Maske nune’e, Kordenador MUTL, Noe Bernadinho, klarifika, sei fó tempu ba PN to’o loron 12 fulan Novembru semana oin hodi deside kontinua sosa kareta foun hamutuk 48 ba membru V lejizlatura ka lae.
“Manifestasaun MUTL ne’ebé mak halo kontra parlamentu nasional sei termina iha loron 12 fulan novembru tamba ne’e nafatin tane matebian sira atu nune’e loke deputadu sira nia neon ho laran nune’e sira bele konsidera MUTL ninia ezizensia ida ne’e”, dehan nia.
Antes ne’e, iha loron (23/10), Vise Prezidente Parlamentu Nasional – VPPN, Maria Angelina Sarmento, esplika, parte PN sei kontinua mantein pozisaun hodi sosa kareta foun ba deputadu V lejizlatura maske MUTL halo manifestasaun hodi kontra desizaun PN nian.
Razaun fundamentu ne’ebé Vise PN aprezenta katak membru PN iha diretu atu hetan kareta hodi hala’o atividade fiskalizasaun iha báze. No, husu ba MUTL no públiku labele haree deit membru PN hamutuk ema na’in 65 ne’e, maibe mós haree governante seluk ne’ebé uza kareta marka prado.
“Deputadu ne’e eleitu pelu-diretamente hosi povu, saida mak nia laiha diretu ba ida ne’e, enkuantu ninia papél ida mak atu ba báze halo fiskalizasaun, entaun dala ruma públiku haree deit mak deputadus na’in 65, maibe sura took diretores hira mak iha ministériu hot-hotu iha diretores hira, i diretores sira uza kareta marka saida? Dala ruma públiku la haree diferensia didiak”, dehan nia.
MUTL nia asaun hahu iha fulan Outobru nia rohan (26/10) to’o loron tersa, (06/11) ejize maka’as ba PN atu kansela sosa kareta prado foun no husu atu dada fila fali kareta prado iha III Lejizlatura nia hodi nune’e bele fasilita serbisu fiskalizaun membru V lejizlatura iha báze.
Durante asaun, manifestante MUTL lor kaixaun hodi taka fotográfia Prezidente Parlamentu Nasional – PPN, Arão Noe Amaral ho Vise Prezidente Parlamentu Nasional – VPPN, Maria Angelina Sarmento, ne’ebé hamosu polímika iha PN. (Editor, Lariwa).