26
Wed, Jun
0 New Articles

Ohin, PNTL Detein Manifestante MUTL Na’in 2

Membru BOP kaptura hela manifestante MUTL iha edifisiu Parlamentu Nasional nia oin. Foto, Edy Cabitan.

Breaking News
Typography

Díli-SMI, Polisia Nasionál Timor-Leste – PNTL, segunda-feira (26/11) detein ona membru Movimentu Universitáriu Timor-Leste – MUTL ne’ebé kontinua hala’o asaun manifestasaun iha kapitál Dili relasiona ho polítika Parlamentu Nasional  sosa kareta prado membru V lejizlatura nian.

Membru na’in rua ne’ebé hetan detein hosi membru Batallaun Orden Públiku – BOP mak hanesan Abrão Abaquele nu’udar responsavél masimu seguransa MUTL no Moises Magno nu’udar membru.

Membru MUTL, Luis Garcia, haktuir kronólojia akontesementu PNTL  katak, membru PNTL hosi Batallaun Orden Públiku – BOP detein membru MUTL na’in 2 depois asaun sunu roda hosi ema deskuinesidu ne’ebé la’os membru MUTL nian.

Luis Garcia hatutan: “Mais ou menus oras 11:00 OTL, reprezentante MUTL ba chek karta petisaun ne'ebé iha dia 21 MUTL entrega. Mas depois de chek karta ne’ebé iha PN. Maibé laiha rezultadu tamba ne'e, Porta voz no Manifestante deside hakat hosi muzeun resistensia ba PN nia iha portaun, hetan Seguransa husi BOP. No iha oras 12:00 masa manas i ajita hosi manifestante no la oras sunu roda hosi ema deskuiñesidu”, dehan Garcia, ba SMI liuhosi SMS Facebook, Segunda, (26/11).

Membru MUTL ne’e mós esplika, durante prosesu detein, membru BOP silu membru MUTL detidu na’in ne’e inklui tolok ka hasai liafuan at hasoru manifestasaun sira.

“Sira kaptura Seguransa MUTL Ir. Abaquele no kaptura mós kolega Moises ne’ebbé hala’o hela orasiu. Sira konsege kaer no silu depois polisia sira dehan Ami PNTL milisi no tolok inahuin ba manifestante inklui kolega ida kaptura ne'e”, haktuir Luis Garcia, liuhosi via sms ba redasaun SMI.

Relasiona ho maluk na’in rua ne’e dadaun hetan detein hosi parte seguransa, Garcia husu ba Komandu Jerál PNTL atu liberta tanba membru MUTL ne’ebé halo asaun la’os ema kriminozu, maibe defende justisa sosiál iha nasaun ida ne’e.

Luis mós esplika, MUTL sei kontinua mantei hala’o asaun protesta hodi Prezidente Parlamentu Nasionál – PPN, Arão Noe Amaral,  hodi anula proposta sosa kareta prado hamutuk 48 ba membru V lejizlatura.

“MUTL sei kontinua hala’o asaun hodi husu Prezidente PN Arão Noe atu anula proposta sosa kareta foun ba deputadu no deputadu sira”, tenik nia.

Maske nune’e, PPN, Arão Noe, Kurta, (22/11), semana kotuk deklara ba mídia nasionál, PN sei la anula proposta orsamentu sosa foun ba deputadu sira wainhira seidauk iha proposta eliminasaun hosi membru V lejizlatura sira.

Antes ne’e, asaun manifestasaun iha loron (09/11) PNTL konsege detein membru manifestante MUTL hamutuk ema na’in 22 ne’ebé kompostu hosi feto ema na’in ida no mane ema na’in 21. Hosi akontesementu ne’e manifestante feto ida kanek tanba hetan tiru ho gas lakrimijeniu.

Tuir observasaun SMI, asaun protesta ohin (26/11) manifestante MUTL kontinua lori kaixaun no spanduk sira ne’ebé hakerek ho liafuan kontra sosa kareta foun ba membru PN sira.

To’o notisia ne’e públika SMI seidauk halo konfirmasaun ba parte PNTL kona-ba motivu hosi detein membru MUTL na’in refere. (Editor, Lariwa).

fShare
1
Pin It

Follow us on Twitter

Sign up via our free email subscription service to receive notifications when new information is available.