Covalima-SMI, Relasiona ho udan boot ne’ebé akontese orseik (28/11) iha parte Kosta-Sul rezulta família uma-kain hamutuk 50 resin hetan inundasaun tanba kauza hosi auto estrada ne’ebé ninia drainagen klot hodi labele fasilita bee sulin ho diak.
Almeiro Moniz, nu’udar família vitima hosi inundasaun, haktuir, maizumenus tuku 5:30 parte lorokraik mosu udan boot ne’ebé la to’o minutu tolu nolu konsege hamosu inundasaun iha Suku Labarai, Aldeia Meop, Munisipiu Covalima.
“Orseik maizumenus udan iha tuku 5:30 no udan kuaze minutu 30 bee hahu nalihun, liu-liu parte estrada leten Suku Labarai, Aldeia Meop. Drainagen iha maibe klot liu ou bee maka’as duni ne’ebé bee sulin fali ba komunidade nia uma”, dehan família vitima inundasaun, Almeiro Moniz, ba SMI liuhosi intervista via telefone, (Kinta, 29/11).
Almeiro, hatutan, akontesementu inundasaun ne’e la’os foin primeira-vez maibe dala-barak ona hahu prosesu konstrusaun infra-estrutura liu-liu auto estrada iha parte Kosta-Sul, iha munisipiu Covalima.
Nia reforsa, komunidade durante ne’e sai vitima ba prosesu dezenvolvimentu infra-estrutura auto estrada iha Suai-Covalima tanba implikasaun hosi konstrusaun drainagen ne’ebé la tuir estandar hodi bele fasilita bee sulin ho diak.
Tuir nia, antes iha konstrusaun auto estrada komunidade iha Suai – Covalima nunka hetan inundasaun iha tempu udan tanba iha bee dalan ne’ebé sufusiente.
“Tempu uluk ami iha esperensia hanesan ne’e. Udan been la mai hosi fatin seluk, maibe hafoin auto-estrada remata situasaun nakfilak oin seluk tanba drainagen hosi auto estrada bee sulin tama komunidade nia uma, tanba korente bee maka’as tebes”, dehan Almeiro.
Nia mós informa, relasiona ho udan boot ne’ebé mosu la’os de’it fó impaktu ba komunidade nia uma (hela fatin) maibe mós inklui uma adat hanesan Mane Hitu, Silibau, De Hilin, Talagatal no seluk tan.
Nune’e mós lutu-toos komunidade Labarai, Aldeia Meop hetan estraga tanba ho volume bee ne’ebé boot durante mosu inundasaun iha area refere.
Iha parte seluk, komunidade ne’ebé sai vitima ba inundasaun, Apolonaria Sequiera, sente preokupa ho situasaun ne’ebé sira infrenta tanba sai vitima ba prosesu dezenvolivimentu auto estrada refere.
Ho nune’e, Apolonaria, ejize ba Governu no kompañia ne’ebé toma konta ba projetu auto estrada hodi haree fila fali kondisaun drainagen ka bee dalan hosi auto estrada refere.
“Komunidade iha ne’e ejize ba Governu ou kompañia atu haree fali bee dalan hosi auto estrada nian”, dehan Apolonaria.
Projetu auto estrada Suai-Zumalai ne’e hetan ona inagurasaun hosi Governu iha loron 17 fulan Novembru 2018. Projetu auto estrada ne’e ho ninia naruk kilometru 30.3 ne’ebé gasta totál orsamentu hamutuk Millaun 304 Dollar Amerikanu.
Projetu kaer hosi kompañia internasional China Overseas Engineering Company – COEC ne’ebé join ho China Railway First Gropu Join Venture – CRFG JV. (Editor, Lariwa).