Díli-SMI, Asosiasaun Jornalista Timor Lorosa’e – AJTL husu ba Primeiru Ministru, Taur Matan Ruak, atu demite (hasai) Xefe Gabinete Sekretáriu Estadu Komunikasaun Sosiál – SEKOMS, Julio de Jesus Goncalves, husi nia kargu relasiona ho ninia hahalok ameasa atu hasai jornalista Constancio Veira (Scos) hosi ninia knár iha RTTL.
Razaun fundamentu hosi AJTL hodi husu Xefe Governu atu halo demisaun ba Xefe Gabinete SEKOMS tanba konsidera ninia atetude ameasa jornalista ne’e la apoiu dezenvolvimentu mídia iha rai-laran inklui hamate liberdade espresaun no liberdade imprensa nasaun foun ida ne’e.
“Husu Priméru Ministru, Taur Matan Ruak atu hasai Xefe Gabinete SEKOMS, Julio husi nia kargu tamba nia atitude la apoiu dezenvolvimentu mídia no liberdade imprensa no liberdade espresaun iha Timor-Leste”, dehan Porta-Voz, AJTL, Acacio Pinto, liuhosi Konferénsia Imprensa, iha Fatuhada, Dili, Kuarta, (30/01).
Porta-Voz AJTL, Acacio Pinto, konsidera atetude ameasa hosi Xefe Gabinte SEKOMS hasoru jornalista RTTL iha loron 11 Janeiru 2019 nu’udar hahalok ditadura ne’ebé la afavor ba prinsipiu liberdade espresaun no liberdade imprensa iha Timor-Leste.
Durante konferénsia imprensa, porta-voz AJTL ne’e mós kondena atuasaun membru Polísia Nasional Timor Leste – PNTL ne’ebé hadau kamára editor Timor Post, Carlos Malilaka, wainhira halo atividade kobertura kona-ba problema ne’ebé mosu iha komunidade nia leet.
Atuasaun pesoál ka indivíduu balu Polísia Nasionál Timor-Leste (PNTL) nian hasoru jornalista ka Editór Timor-Post, Carlos Malilaka foin dadauk ne’e iha Bebonuk-Dili nu’udar mós aktu asesivu no ameasa ida ba liberdade jornalista nian atu halo kobertura ba problema sira ne’ebé mosu iha sosiadade nia leet.
“Kondena maka’as atuasaun indivídu ka pesoál balu PNTL nian ne’ebé ameasa no hadau Jornalista ka editór Timor Post, Carlos Malilaka nia kamera iha area Bebonuk. Aktu ida-ne’e nu’udar aktu krime ne’ebé ameasa liberdade imprensa no liberdade jornalista nian hodi asesu ba informasaun”, tenik Acacio.
Nune’e mós, porta-voz ne’e hatutan, AJTL mós konsidera desizaun Ministériu Negósiu Estranjeiru no Kooperasaun – MNEK ne’ebé hapara derepenti distribuisaun jornál Independente hanesan forma ida atu halo sensura ba fluta informasaun iha Timor-Leste nu’udar país demokrátiku.
No, nu’udar aktu impedementu ba diretu públiku atu hetan asesu informasaun ne’ebé garante tiha ona konstituisaun RDTL.
“Desizaun Ministériu Negósiu Estranjeiru no Kooperasaun (MNEK) nian hodi hapara distribuisaun Jornál Independente nian mós nu’udar forma sensura (ka censorship) ida ba fluta informasaun iha país demokrátika Timor-Leste no ida-ne’e nu’udar forma impedimentu ba direitu sidadaun nian hodi asesu ba informasun ne’ebé hatuur iha Konstituisaun RDTL”, katak porta-voz ne’e.
To’o notisia ne’e públika jornalista SMI seidauk konsege halo konfirmasaun ba parte sira ne’ebé AJTL mensiona iha notisia ne’e. (Editor, Lariwa).
