Liquiça – SMI, Aviaun Aero Díli ho númeru rejistu 4W-AAA ne’ebé hala’o atividade komersiu ka movimentu semo ba mai entre Munisípiu Dili – Covalima hetan insidente ka monu iha Pilila, Suku Lauhata, Postu Administrativu Liquiça, Munisípiu Díli.
Tuir komunikadu ne’ebé fó sai hosi Aero Díli esplika, aviaun aero Díli hetan insidente tanba hetan avariasaun durante semo hosi munisípiu Covalima mai kapitál Dili.
Relasiona situasaun aviaun ne’ebé hetan avariasaun, pilotu deside hodi halo emergency Landing iha rai mamuk iha area Liquiça nian.
“Aviaun hetan avariasaun durante sira tama ona iha área Liquiça nian. Tanba ne’e mak pilotu desidi atu halo emergency landing iha rai mamuk, maibe la konsege hetan rai luan, nune’e nia desidi atu aterra iha estrada”, dehan komunikadu ne’ebé SMI asesu, Kuarta, (20/02).
Komunikadu ne’e klarifika, tuir loloos pilotu ninia intensaun atu aterra iha estrada maibe tanba aviaun nia liras kait fiu eletrisidade ne’ebé la konsege tun iha rai-maran ho diak.
“Maibe kait iha fiu eletrisidade nian ida iha ne’eba hodi rezulta aviaun lakon balansu, maibe pilotu konsege hatun duni aviaun iha rai maran no la afeta ba komunidade nian uma”, dehan komunikadu ne’e.
Komunikadu ne’e haktuir, durante asidente ne’e aviaun tula hela pasanjeirus hosi munisípiu Covalima mai kapitál Díli maibe la rezulta ema kanek no mate.
No, impaktu hosi ansidente ne’e rezulta aviaun hetan estragus iha liras karuk no iha propeller.
Nune’e mós hafoin hetan asidente tuir prosedementu pilotu rasik kontaktu direta ambulansia hodi lori pasajeirus ba Hospitál Nasional Guidu Valadares – HGV para hetan tratamentu médiku.
Liga ho kauza ba avariasaun aviaun nian, kompañia Aero Dili entrega tomak ba parte kompetenti hanesan Aviasaun Sivil atu halo prosesu investigasaun ba insidenti ne’e.
Dezde Timor-Leste hetan ninia independensia foin dala-primeiru aviaun aero Díli hetan insidente. (Editor, Lariwa)
