Díli-SMI, Membru Parlamentu Nasional – PN Komisaun C ba asuntu infra-estrutura ejize ba Governu no kompañia hodi hadi’a lalais auto-estrada Suai ne’ebé parte balun at fila fali maske rezultadu fiskalizasaun hatudu 100% hosi konstrusaun auto-estrada refere.
“Husu governu ho kompania urjentemente tenke hadi’a lalais auto-estrada Suai ne’ebé estrada parte balu aat no nakfera hela. Auto-estrada Suai hotu ona 100% maibe iha estrada parte balu at hela”, dehan deputadu, Fabiao de Oliveira, iha uma fukun PN, Tersa, (05/03).
Tuir Fabiao, presiza iha estudu viabilidade kona-ba drainazen sira iha auto-estrada nian hodi labele fó impaktu ba komunidade wainhira tempu udan. Tanba bee bele nalihun iha ponte okos hodi hamosu picina kiik ne’ebé estraga ambiente no impede movimentu komunidade iha area refere.
“Tenke iha estudu viablidade kona-ba drainzen ne’ebé ke iha auto estrada refere, se lae to’o tempu udan fó impaktu auto-estrada ne’ebe iha ponte okos sai fali pixina hodi lori bee ba iha komunidade sira hodi fo impaktu ba komunidade sira ne’ebe mak hela iha kraik”, dehan nia.
Deputadu ne’e mós rekomenda ba Governu atu fó samada atensaun ba Ajénsia Dezenvolvimentu Nasional – ADN atu halo supervizaun diariamente hamutuk ho Ministériu Obras Públika – MOP atu nune’e bele garante kualidade infra-estrutura auto-estrada Suai nian.
Membru V lejislatura ne’e mós preokupa ho membru ADN ne’ebé limitadu hodi labele halo supervizaun ho efisiente ba mega projetu auto-estrada Suai ne’ebé ikus mai hatudu rezultadu laiha kualidade.
“Tenki aumenta tan staf iha ADN tanba iha staf na’in tolu deit ho sira nia maneger, ne’e la to’o para atu halo suprivizaun ba akompaniamnetu ba iha projeitu em geral tomak, entaun saida mak akontese nia impaktu mak ba kualidade ida ne’e presiza sita mós iha relatoriu refere”, tenik nia.
Iha esprensia fulan Novembru tinan 2018, maizumenus komunidade hamutuk uma-kain 50 iha Aldeia Meop, Suku Labarai, Munisipiu Covalima hetan impaktu hosi inundasaun relasiona ho udan boot tanba drainagen auto-estrada ne’ebé klot hodi labele fasilita bee sulin ho diak.
Projetu auto-estrada entre Suai – Zumalai ne’ebé ho naruk kilometru 30.3 ne’e rasik hetan ona inagurasaun hosi Governu iha loron 17 fulan Novembru tinan tinan 2018.
Mega projetu ne’e rasik kaer hosi kompañia Internasional China Overseas Engineering Company – COEC ne’ebé konsorsiu ho China Railway First Group Join Venture – CRFG JV no gasta orsamentu hamutuk millaun 304 Dollar Amerikanu. (Editor, Lariwa).
