Díli-SMI: Xefe VIII Governu Konstitusional, Taur Matan Ruak, hato’o pedidu ba Prezidente Repúblika, Francisco Guterres “Lu Olo” hodi husu atu demite Vise Ministra Saúde, Elia António de Araújo dos Reis Amaral.
Bázeia ba pedidu refere, Prezidente Repúblika, Francisco Guterres “Lú Olo” dekreta ona proposta Primeiru Ministru, Taur Matan Ruak, no ofisiálmente hasai ona Vise Ministra Saúde, Elia de Araújo Amaral hosi estrutura VIII Governu nian.
Ezenorasaun ne’e bázea ba dekretu Prezidente Repúblika Númeru 30/2020 loron 3 fulan Abril.
Dokumentu ofisiál hosi Gabinete Prezidente Repúblika kona-ba dekreta proposta ezenorasaun Vise Ministra Saúde ne’e ho númeru 30 ne’ebé tama em vigor iha loron 3 fulan Abril 2020.
Hosi dokumentu ofisiál hakerek ho língua Portuguez ne’ebé parte redasaun SMI asesu katak bázeia ba artigu 1 Dekretu Prezidente Repúblika Nú 30/2020 ezenora ka hasai ona ofisiálmente Vise Ministra Saúde no atúal Ministra Saúde Interina hosi ninia kargu iha VIII Governu Konstitusional.
Xefe Estadu uza artigu 86 alinea h Konstituisaun Repúblika hodi dekreta proposta hosi VIII Governu kona-ba ezenorasaun Vise Ministra Saúde.
Tuir observasaun SMI katak razaun PM Taur Matan Ruak husu demite Vise Ministra Saúde hosi ninia kargu hafoin mosu konfrontu hosi Elia relasiona ho publikasaun informasaun kona-ba Virus Corona ka COVID-19. (Editor, Guido Santos).
