Díli-SMI: Konselleiru Superior Partidu KHUNTO, José dos Santos “Naimori Bucar”, deklara, iha tempu badak nia-laran hamutuk ho estrutura partidu nian hodi manda karta ida ba tribunal hodi deklara ofisialmente retira hosi koligasaun AMP foun ne’ebé lidera hosi Kay Rala Xanana Gusmão
“Ha’u sente katak iha tempu badak ho estrutura sei halo surat ruma, sei haruka ba tribunál, para tribunal hatene katak ami sai hosi aliadu (AMP) ida ne’e”, dehan Naimori, iha ninia rezidénsia, Manleuana, Kinta, (30/04).
Razaun fundamentu hosi partidu KHUNTO hodi deside halo divórsiu ho AMP tanba atu asegura VIII Governu ne’ebé lidera hosi Primeiru Ministru, Taur Matan Ruak.
Nune’e mós tanba to’o ohin parte Prezidente-da-Repúblika seidauk dekreta pedidu IX Governu ne’ebé lidera hosi Kay Rala Xanana Gusmão
“Koligasaun foun ne’ebé lidera hosi maun Xanana fó ba Prezidente ne’e seidauk anúnsiu hosi prezidente katak atu fó ba nonu Governu. Tanba sei fó fiar ba VIII Governu atu rezolve problema nia problema”, Tenik Naimori.
Ho nune’e, José Naimori Bucar, hatutan, partidu KHUNTO sei kontinua fó ninia apoiu ba VIII Governu to’o mandate remata iha tinan 2023.
Nia klarifika, maske deside ona sai hosi partidu koligasaun AMP foun maibe parte KHUNTO sei la halo koligasaun foun ho partidu FRETILIN hodi soran lider sira. Tan-ne’e, ninia parte deklara katak KHUNTO ninia desizaun sai hosi koligasaun atu hakotu impase polítika iha rai-laran.
Konselleiru másimu partidu KHUNTO ne’e mós husu ba líder partidu polítiku sira atu kria paz no estabilidade hodi kontribui ba dezenvolvimentu nasional. (Editór, Guido Santos).