Lautem-SMI: Komunidade Suku Daudere, Postu Administrativu Lautem, Munisípiu Lautem hetan bala-musan ne’ebé deskonfia milítar Indonéziu nian wainhira hala’o operasaun buka forsa FALINTIL durante okupasaun tinan 24 nia laran.
Komandante Polísia Nasional Timor Leste – PNTL Eskuadra Lautem, Valentim da Costa, esplika, bala-musan ne’ebé dadaun parte PNTL indentifikadu parte Tentara Nasional Indonesia – TNI durante halo okupasaun iha timor.
“Sim, sim bala-musan ne’e hosi Indonézia nian duni, bala-musan maujer nian. eis milítar Indonézia nian mas kleur ona”, dehan, Komandante Eskuadra Lautem, Inspetór, Valentim da Costa, ba SMI, Sesta, (19/06).
Komandante Eskuadra ne’e, informa, bala-musan ne’ebé komunidade hetan ne’e nu’udar bala-musan kilat-mauser ne’ebé uluk milítar Indonézia nia maibe la-hatene karik sira haluha ka tiru -malu mak husik iha area refere.
“Buat ne’e (bala-musan) ne’e iha rai-okos. Ida-ne’e ita ladun hatene karik iha tempu ne’ebá tiru-malu ka lae, ita la-hatene”, dehan nian.
Nia hatutan, iha tempu badak nian laran sei aprezenta ba komandante Munisípiu hosi rezultadu indentifikasaun bala-musan iha suku Daudere.
“Hau sei lori ba entrega iha munisípiu tanba ami mos foin lalais halo seguransa ba pagamentu subsídiu. Verbalmente hato’o tiha ona maibe sei kompleta ho relatóriu eskrita hodi submete ba komandu distrital”, tenik nia.
Iha parte ketak, Xefe Suku Daudere, Aderito Morais, ne’ebé SMI konfirma, esplika, bala-musan ne’ebé ninia komunidade hetan ne’e hamutuk 40 hosi kilat mauser iha area Leuluka-Taidili (aldeia makalodo) Suco Daudere nian.
Membru PNTL dada hela police line iha fatin hetan bala-musan iha area Suku Daudere. Foto, Aderito Morais.
Aderito, esplika, bala-musan ne’e hosi labarik ida ho naran Alito Pires, tinan 12, wainhira atu halo lasu ba manu-fuik iha area refere.
“Labarik Ida Mak hetan wainhira halo ou monta lasu ba manu fuik(tafuik). Hetan iha dia 15 Juñu 2020. Labarik ne’e hosi aldeia Aelafa naran Alito Pires, Tinan 12”, katak autoridade lokál ne’e.
Nia esplika tan, bala-musan ne’ebé ninia komunidade hetan ne’e hamutuk 40 maibe 38 mak sei diak (kompletu) no 2 mak at ka mamuk ona.
“Bala-musan hamutuk 40, 38 sei diak,2 mak mamuk ona”, katak nian
No, dadaun ne’e bala-musan refere asegura ona iha parte eskuadra polísia Lautem nian. (Editór, Lariwa).
