Lospalos-SMI: Komandu Polísia Nasional Timor-Leste – PNTL munisípiu Lautém kaptura ona suspeita ho inisiál AFBC ne’ebé identifikadu soe bebe feto (kosok-oan) iha area Paihoto, aldeia Chauluturu, Suku Fuiluro, Postu Administrativu Lospalos, Munisípiu Lautém, semana hirak liu-ba.
Komandante PNTL munisípiu Lautém, Superintendente Polísia, António Rego Fernandes, esplika, suspeitu ka autór soe bebe feto ne’e kaptura hosi membru Polísia Sientifika Investigasaun Kriminal -PSIK ho Unidade Pesoal Vulneravel – UPV iha loron Dominggu, (26/07) foin lalais ne’e.
“Dia 23 liu-ba Ita-nia polísia sira halo atendementu kona-ba kazu soe bebe, depois dia 24 evakua kedas mate isin bebe feto ne’e ba Díli hodi halo autopsia, la’os Ita para de’it iha ne’e Polísia Investigasaun Kriminál nian hamutuk ho Polísia Vulnerable Personal Unit servisu maka’as bele Kaptura suspeita ne’e iha loron 26 Fulan Jullu ne’e,” esplika, Superintendente Polísia, Antonio Rego Fernandes, ba SMI, Tersa, (28/07).
Komandante ne’e klarifika, suspeita ho inisiál AFBC ne’ebé parte PSIK no UPV kaptura ne’e sei klosan hosi aldeia Asalainu, Suku Fuiluro, Postu Administrativu Lospalos, Munisípiu Lautém nian.
Tuir kronólojia polísia halo kaptursaun ba suspeita AFBC iha kapitál Díli bázea ba informasaun intelejénsia ne’ebé deskobre suspeita mai halo tratamentu saúde.
“Suspeita ne’e solteira ho nia inisiál AFBC hosi Suku Fuiluro, Aldeia Asalaniu, munisípiu Lautém, ne’ebé da-daun dezenvolve ho ninia identidade, suspeita iha ona kapitál Dili iha dia 26 liu-ba ho razaun nia ba Díli atu halo tratamentu saúde, maibé servisu intelijénsia halo presede iha fatin ne’eba depois deskonfia duni ema ne’e hanesan suspeita ba soe bebe feto ne’e, (polísia) hodi halo kapturasaun kedan”, katak, komandante Antonio Rego.
Suspeita AFBC nu’udar auxiliar tekniku iha eskola ida ne’ebé partense ba Suku Rasa, postu Administrativu Lospalos nian.
“Suspeita hanesan mós auxiliar iha eskola balun iha suku Rasa nian, no ba da-daun iha ona unidade pesoal nasionál nia liman hodi halo tratamentu saúde”, dehan nia.
Nia afirma, relasaun ho kazu soe bebe ne’e, parte Komandu PNTL munisípiu Lautém hamutuk ho VPU hodi halo investigasaun ba suspeita kona-ba motiva soe bebe wainhira supeira rokepera ona ninia saúde.
Nia aumenta, kazu refere rejista ona iha komandu PNTL munisípiu Lautém ne’ebé sei kontinua halo aprezenta ba Ministériu Públiku wainhira prosesu investigasaun remata ona.
Hosi rezultadu investigasaun pre-leminariu paste polísia iha ona indikasaun ba suspeitu mane ne’ebé deskonfia hanesan aman ba bebe feto ne’e rasik.
Antes ne’e, labarik ida ho naran Benjamin Franklin Foelo, ho idade 15 hosi suku Fuiluro ne’ebé mak hetan mate-isin bebe feto iha parte lorokraik wainhira fila hosi ninia eskola.
No, labarik ne’e hakfodak hafoin to’o iha ninia rezidénsia haree asun dada mate-isin bebe feto ne’ebé ho kondisaun fiziku la kompletu tanba asu han ona orgaun balun hosi bebe hanesan ulun no kelen. (Editór, Guido Santos).
