Díli-SMI: Komisariu Komisaun Anti Korupsaun – KAK, Sergio Hornai, esplika, durante prosesu distribuisaun subsídu $200,00 USD ba kada uma-kain iha teritóriu laran, KAK konsege detekta parte Ministériu Solidariedade Sosiál no Inkluzaun – MSSI halo nepotizu liu-hosi desizaun aluga kareta kompañia privadu ne’ebé ninia perfíl la-klaru.
Tuir Sergio, loloos ne’e parte MSSI fó prioridade hodi uza rekursu (veiklu) Estadu nian kompara ho aluga kareta privadu ne’ebé fó impaktu boot ba gastu orsamentu estadu nian.
“MSSI fó prioridade ba rekursu estadu hanesan utiliza veíkulu estadu nian, envesde aluga veíkulu privada sira ne’ebé implika ba kustu ka gastus ne’ebé la nesesariu no kompañia privada hirak ne’e ninia perfíl mós la klaru no potensialmente iha indisius favoritizmu/familiarizmu iha prosesu selesaun no desizaun sira”, dehan, Sergio Hornai, iha Edifísiu KAK, Farol, Kuarta, (05/08) durante hala’o konferénsia imprensa ho mídia sira.
Iha konferénsia imprensa refere, Sergio Hornai, husu ba benefisiariu la-elijivel ba subsídiu COVID-19 atu fó fila orsan ba Estadu atu nune’e labele hetan konsekuiensia legál iha futuru.
“Husu atu benefisiariu sira la-elijivel ba subsidiu agregadu familiar atu voluntariamente fó fila ka devolve fali osan Estadu nian ka simu ninian konsekuensia tuir lei”, dehan, Hornai.
Liu-hosi akompañamentu no monitorizasaun ekipa konjunta KAK ba subsídiu agregadu familiar iha ambitu COVID-19 ne’ebé kompostu hosi instituisaun KAK, PDHJ, IGE no CFP konsege salva orsan Estadu hamutuk $.385.400,00 USD.
Hosi totál orsamentu $.385.400,00 USD ne’ebé ekipa KAK salva ne’e mai hosi pagamentu ba familia agregadu hamutuk ema na’in 1927 nian.
“Serbisu akompañamentu no monitorizasaun ba subsidiu Agregadu familiar iha ámbitu COVID-19 konsege trava/impede benefisiáriu ne’ebé atu asesu ba subsidiu agregadu familiar ne’e hamutuk: 1927 no salva osan estadu ho totál estimativa U$385.400.00”, katak nia.
No, tuir dadus ekipa konjunta KAK ne’ebé identifika katak maizumenus benefisiariu ne’ebé la-elijivel hamutuk ema na’in 148 mak simu ona subsídiu COVID-19 ho montante orsamentu $.200,00 USD.
“Ekipa konjunta identifika benefisiariu sira ne’ebe la elejível tuir lei maibé konsege simu/asesu tiha ona ba subsidiu hamutuk benefisiariu 148 ho total osan hamutuk US$29.600”, tenik nia.
Hosi dadus benefisiariu la elijivel ne’e identifika ema ho saláriu liu $500,00 USD mós hetan aprova hodi simu subsídiu $.200,00 USD refere.
“Iha dadus no prova katak benefisiáriu sira ho saláriu/rendimentu mensal superior US$500.00 maibé sira mós naran sai iha lista aprovadu hodi asesu ba fundu apoiu agregadu familiar ne’e,” katak nia.
Ekipa konjunta KAK mós deskobre aktu autoridade lokál sira fó oportunidade ba joven ne’ebé seidauk harii uma-kain mós rejistu sai benefisiariu ba subsídiu familia agregadu ne’e.
“Iha impresaun no indísius katak autoridade lokál no komunitaria sira permite joven sira livremente rejistu nu’udar benefisiáriu tanba la iha prosesu verifikasaun ida rigorozu husi MAE no MSSI”, tenik komisariu KAK ne’e.
Liga ho kazu infrasaun sira ne’ebé invole hosi parte MSSI no autoridade komunitáriu sira, ekipa KAK sei halo averiguasaun no apuramentu antes halo prosesu judisial nian. (Editor, Rui Santos).
