Covalima-SMI: Maizumenus ema atus hitu (700) iha Suku Dato Tolu, Postu Administrativu Fohorem, Munisípiu Covalima, dezde ukun-an to’o ohin loron kontinua konsumu bee hosi mota ba nesesidade lor-loron tanba seidauk asesu bee-moos hosi Estadu.
Verdial de Jesus Barros, estudante universitariu sente preokupa ho situasaun atual ne’ebé komunidade aldeia tolu hanesan Aldeia Fatuk Kabuar Leten, Fatuk Kabuar Kraik no Natardik iha suku Dato Tolu, Postu Administrativu Fohorem, ne’ebé besik tinan 20 la’os de’it la asesu bee-moos maibe mós seidauk asesu eletrisidade.
“Povu la husu poder, maibe povu ejize de’it mak eletrisidade ,estrada, no bee-mos. Tinan barak ona (komunidade) la asesu ba eletrisidade, nu’udar reprezentante estudante, nu’udar komunidade husu ba iha futuru mak tenke atende lais problema ne’ebé mak ami hasoru ne’e”, dehan, Verdial Barros, iha Suku Dato Tolu, Duminggu, (09/08).
Nune’e, reprezentante estudante ne’e husu ba Governu liu-liu Ministériu Obras Publikas atu tau konsiderasaun ba preokupasaun komunidade atus hitu iha suku Fohorem refere.
“Ministériu Obras Publicas tau ona nia agenda planu ba ninia implementasaun atu nune’e bele rezolve netik suku dato tolu nia preokupasaun tinan barak ona la asesu ba eletrisidade (bee-moos) no Estrada”, dehan nia.
Iha biban hanesan, Zelia de Jesus, reprezentante iha suku Dato Tolu mós sente preokupa ho kondisaun atual komunidade suku Dato Tolu ne’ebé to’o ohin seidauk asesu eletrisidade no be-moos hanesan suku seluk iha munisípiu Covalima nian.
“Ami sente triste tebes tebes,tanba durante ne’e ami la hetan bee-moos. Ami komunidade iha ne’e araska tebes tebes kona-ba bee-moos no la asesu ba eletrisidade no estrada, oinsa mak governu sira bele tau matan netik ba ami”, dehan Zelia.
Nune’e mós, iha parte ketak, Xefe Suku Dato Tolu, Agostinho Resi, rekuiñese duni katak dezde ukun-an to’o ohin loron ninia komunidade seidauk asesu eletrisidade, bee-moos no estrada ne’ebé di’ak.
Autoridade lokál ne’e esplika, problema boot ne’ebé nia ho ninia komunidade hasoru mak kona-ba estrada ne’ebé liga ho suku Dato Tolu ba postu Administrativu Fohorem, Munisípiu Covalima.
“Liu-liu kona-ba estrada ami aproveita estrada ne’e tempu bai-loron de’it, bainhira tempu udan ne’e araska liu tanba rai monu arbiru, tanba udan mai bee estraga hotu estrada, komunidade difisil tebes (asesu estrada) bainhira tempu udan”, katak Agostinho.
To’o notisia ne’e públika parte SMI seidauk konsege konfirma ho parte Governu liu-liu Administrador munisípiu Covalima kona-ba asuntu refere. (Francisca Soares).
