Díli-SMI: Kompetisaun moris iha sidade Díli ne’ebé ho dezafiu oi-oin la-sai obstaklu bai nan isin-rua, Blandian Tunis, halo serbisu pineira rai-henek iha mota Comoro hodi sustenta nesesidade família nian wainhira ninia laen moras no labele halo atividade pineira rai-henek hodi sustenta familia.
Blandina Tunis, esplika, maske dala-ruma ho kondisaun moras kontinua halo serbisu pineira rai-henek tanba ejizensia uma-laran liu-liu atu responde nesesidade lor-loron família no selu oan nia eskola.
“Foin dadauk ha’u moras, ha’u ba konsulta (depois) di’ak oituan ha’u nafatin ba pineira rai-henek. Maske moras nafatin esforsu hodi pineira rai-henek (atu) responde ba nesesidae uma-laran no oan nia eskola”, dehan, Blandia Tunis, iha ninia rezidensia Aldeia Moris Foun, Comoro, Segunda, (26/07).
Blandiana, esplika, ninia atividade pineira rai-henek loron ida hetan de’it ret ida tuir ninia forsa fiziku hanesan feto. Maibe, bainhira ninia laen moras nia tenke haruka ema seluk atu tula ba kareta no selu ho orsan rai-henek ne’ebé nia tula.
"Ha’u pineira loron Ida la to ret ida, karik ha’u nia la’en moras ha’u selu fali ema atu tula ba kareta depois mak ha’u fó fali sira orsan oituan”, tenik nia.
Iha parte seluk, Martinho Mauno, nu’udar laen ba hosi Blandina Tunis, rekuiñese katak durante ne’e ninia ferikoan halo duni serbisu pineira rai-henek maske nia rasik fó hatene halo atividade refere tanba bele afeita ba ninia saúde.
Maibe, Martinho, hatutan, tanba nesesidade família uma laran obriga mak nia mós halo tuir de’it ninia fen hodi ajuda nia pineira rai-henek lor-loron iha mota Comoro.
"Dala-ruma ha’u hatete ba ferik-oan di’ak liu ha’u mesak mak pineira, ha’u nia ferik-oan, nia lakohi nia obriga, husik ba Ita pineira ami ajuda”, katak Martinho.
Nia mós informa, durante ne’e nia mak halo serbisu pineira rai-henek maibe bainhira nia moras mak ninia fen no oan feto boot mak troka hodi halo atividade pineira rai-henek lor-loron hodi bele sustenta.
"Dala-ruma hanesan ha’u moras ka ha’u nia kanotak naksalak ruma ka ne’e, ha’u nia fen ho oan feto boot ne’e terpaksa sira sai (pineira rai-henek), karik ha’u moras semana ida ka rua ne’e sira sai ba pineira neneik”, katak nia.
Ho realidade moris ne’ebé nia ho família hasoru halo nia dala-ruma hanoin barak tanba feto mak halo fali serbisu pineira rai-henek, nune’e nia rasik kontinua ba halo pineira rai-henek maske kondisaun moras hela.
Martinho Mauno ho Nia kaben hari’i uma kain iha tinan 2003 ne’ebé hahoris oan na’in 4 no dadaun ne’e hela ela iha aldeia Moris foun, suku Comoro, Postu Administrativu Dom Aleixo, Munisípiu Díli. (Editór, Caleri).
