Díli-SMI: Komisaun Anti Korupsaun – KAK ezekuta mandadu Tribunal Distrital Díli – TDD hodi halo kapturasaun no detensaun ba emprezariu estranjeiru ne’ebé durante ne’e manan projetu iha Rejiaun Administrasaun Espesial Oecusse Ambeno – RAEOA tanba la-selu taxa inklui lisensa kompañia hanesan devidas, sertidaun komérsiu no dokumentu relevante sira tuir aprovizionamentu invalidu ona.
Ekipa Investigador KAK ne’ebé ezekuta mandadu kapturasaun ba sidadaun estranjeiru mane na’in 2 hosi nasaun Srilanka nomós sidadaun feto na’in 2 hosi Timor-Leste tanba komete krime hanesan la selu taxa durante tinan 9 inklui lisensa komérsiu no dokumentu relevante seluk invalidu ona.
“Ezekuta mandadu Tribunal Distrital Dili nian hodi halo buska, apreensaun, kapturasaun no detensaun ba emprezariu nain hat (4) tamba komete krimi "evasão fiscal-la selu taxa" durante tinan sia (9).
"Rezultadu servisu sekreta KAK nian iha terenu revela katak suspeitu ho sira ninian kompañia kontinua manan projeitus iha Ministériu Saúde no iha RAEOA Oecusse maske kompañia ninian devidas, lisensa komérsiu invalidu (mate) ona”, dehan, Diretúr Nasional Investigasaun Kriminal KAK, Emilio Quintas, iha Edifisiu KAK, Farol-Díli, Tersa, (17/08).
Asaun represivu hosi ekipa KAK hodi halo kapturasaun ba arguidu sira emprezariu estranjeiru mane rua hosi nasaun Srilanka no sidadaun feto na’in 2 hosi Timor-Leste ne’e bazeia ba mandadu ne’ebé asina hosi juiza, Ersilia de Jesus.
Emilio Quintas, esplika, detidu sira na’in hat ne’e maioria manan projeitu hodi fornese ekipamentu saúde no aimoruk ba Hospital referal RAEOA – Oecusse hahú hosi tinan 2012 to’o 2020 maibe la selu taxa ba Estadu.
“Detidus na’in hat ne’e maioria supply ekipamentus saude no aimoruk iha Ministeriu Saude (MS) no Regiao Administrativa Especial Oe-Cusse Ambeno (RAEOA) Oecusse. Sira nian kompañia hamutuk rua lokaliza iha Fatuhada no durante hala’o aktividades komersia la selu taxa ba Estadu durante tinan sia (9); hosi tinan 2012 too 2020”, katak, Emilio.
Suspeitu estranjeiru mane na’in rua ne’e ida doutor ne’ebé uluk servisu iha hospital no ida seluk emprezariu ho dupla nasionalidade Srilanka no Timor-Leste ho ninian espouza Timoroan ne'ebe sai mos suspeitu. Suspeitu feto seluk emprezariu joven no universitaria ida estuda iha Institutu Censia Saúde – ICS, Comoro - Dili.
Diretúr ne’e, afirma, kazu ne’e rasik parte investigador KAK halo ona vizilansia ka tuir ho kuidadu durante tempu naruk liu-hosi investigasaun klean ba sasin sira, buka evidénsia no halo serbisu sekretu halibur dokumentu sira ne’ebé iha relasaun ho kazu refere.
Durante hala’o operasaun buska, apreensaun no detensaun, investigador KAK foti dokumentu sira ne’ebé iha indisius sai evidénsia forte ba aktu krime hosi emprezariu hirak ne’e.
“Iha operasaun buska, apreensaun no detensaun, konsege halibur dokumentus lubun boot; passporte, konta bankaria, dokumentus kompañia rua nian, laptop, telefone, no dokumentus sobre projeitus balun iha Ministeriu Saude ne’ebé kompañiaa rua ne’e manan nu’udar evidénsia no objetivu krime”, tenik nia.
Relasaun ho kazu refere, parte investigador KAK nian sei halo investigasaun klean liu-tan hodi rekolla informasaun no evidénsia iha instituisaun relevante sira hanesan Ministeriu Saude, Instituisaun autonoma SAMES, Ministériu Finansas no RAEOA Oecusse atu revela verdade iha prosesu aprovizionamentu nian.
Rezultadu hosi buska, apreensaun no kapturasaun ba emprezariu estranjeiru na’in 2 no Timoroan na’in 2 refere konsege prende dokumentu importante sira ne’ebé iha ligasaun ho fornesementu ekipamentu saúde ba Ministériu Saúde iha RAEOA-Oecusse.
“Depende ba dokumentus sira ne’ebé ohin ami buska no prende ne’e relasaun maka’as liu ba iha Ministeriu Saude no iha RAEOA Oecusse. Liu-liu (fornesimentu) ekipamentus saude no aimoruk”, katak nia.
Ekipa investigador halo kapturasaun ba arguido na’in hat (4) iha fatin hat diferente mak hanesan Mandarin, Fatuhada, Bairopite no Campus ICS Comoro Dili. (Editór, Caleri).
