Díli-SMI: Xefe Governu, Taur Matan Ruak, afirma, halo ona aprosimasaun ho Xefe Estadu, Francisco Guterres “Lú Ólo” hodi buka dalan atu monta membru Falintil Forsa Defeza Timor-Leste – F-FDTL iha liña fronteira iha tempu badak nia laran hodi nune’e bele evita movimentu ilegal tama no sai hosi fronteira trestre nian.
“Ha’u konsulta ho Sua-Exelénsia Prezidente Repúblika no fó ona instrusoins ba Vise Ministru Interiór no Ministru Defeza para halo diskusaun para ké tau Forsa Armadas iha Fronteiras, se la’ós tinan ida-ne’e, tinan oin”, dehan, Primeiru Ministru, Taur Matan Ruak, iha Parlamentu Nasional – PN wainhira responde preokupasaun deputadu sira iha ámbitu diskusaun estensaun Estadu Emerj’ensia ba dala 17, Tersa, (24/08).
Desizaun ne’e foti hodi monta milítar iha liña fronteira tanba sente preokupa ho situasaun movimentu ilegal ne’ebé aumenta pior ne’ebé parte seguransa polisia labele deskobre maibe milítar Indonézia mak kaptura no deporta fila mai rai-laran.
“Ha’u hakarak ha’u nia mandatu remata Forsas Armadas iha fronteiras, ha’u mós preokupa uma posível pasajen ida ema atus nune’e, Indonézia hatene ita la-hatene, ne’e imposivél”, katak nia.
Xefe Ezekutivu ne’e, konsidera pasajen ilegal ba Indonézia ne’e iha indísius ba krime organizadu ne’ebé involve mós membru instituisaun PNTL balun, nune’e susar tebes ba parte Unidade Polísia Fronteira labele deteta.
Tan-ne’e, líder ezekutivu ne’e fó orientasaun atu indentifika elementu polísia sira ne’ebé deskonfia involve iha krime organizadu hodi kaptura hodi bele responsabiliza sira nia aktu refere.
“Ha’u bele iha ne’e hateten, katak pasajen ilegais iha fronteira ne’e kuaze ha’u bele hateten 98 ou 99 % krime organizadu, iha ita-nia elementu polísia balun, ha’u haruka kaer, iha Veteranus balun ha’u haruka kaer.
“Ne’e la’ós foin, ne’e buat ne’e mai tempu naruk ona í daudaun ekipa ida serbisu ho polísia Indonézia para tama uma sai uma kaer ema, ita iha kooperasaun di’ak ho señór Embaixadór Indonézia akreditadu iha Timor, Autoridade sira provínsia NTT nian, ita iha kooperasaun di’ak ne’e ajuda ita, ita lori ita-nia oan sira mai iha ne’e”, tenik, TMR.
Eis Xefe Estadu ne’e kontinua apresia ba esforsu serbisu hosi UPF ne’ebé durante ne’e hala’o misaun garante seguransa iha liña fronteira maske membru polísia balun uza dalan ilegal ne’e sai hanesan negósiu durante ne’e.
“Ita-nia polísia sira halo esforsu liu-liu UPF halo esforsu boot, ita labele ezije liu buat ne’ebé sira bele halo, ita agradese tomak sira-nia sakrifísiu maibé iha mós elementu balun uza buat ida ne’e sai negósiu”, katak, eis komandante Falintil ne’e. (Editór, Caleri).