18
Sat, Sep
1 New Articles

Lere Lansa Fatuk Dahuluk Baze Milítar Iha Atabae

Seremónia lansamentu fatuk dahuluk konstrusaun baze milítar iha Damalara, Atabae – Bobonaro. Foto, Mídia MD.

Flash News

Atabae-SMI: Komandante Jerál Falintil Forsa Defeza Timor-Leste – F-FDTL, Tenente Jenerál, Lere Anan Timur, hala’o lansamentu fatuk dahuluk kona-ba establesementu baze milítar iha aldeia Damalara, suku Aidabaleten, Postu Administrativu Atabae, Munisípiu Bobonaro hodi asegura teritóriu nasional hosi ameasa esternal iha futuru.

Lansamentu fatuk dahuluk ba konstrusaun baze milítar ne’e atu fasilita destakamentu membru F-FDTL hodi asegura fronteira trestre nomós nu’udar parte ida hosi atu moderniza instituisaun defeza di’ak liu-tan tuir ameasa global nian.

“Konstrusaun ne’e objetivu atu destakas efetivus iha baze milítar hodi asegura fronteira iha munisípiu Bobonaro, nomós atu moderniza F-FDTL iha future”, katak, Tenente Jenerál, Lere Anan Timur, iha seremónia lansamentu fatuk dahuluk iha Damalara, Atabae, Kinta, (26/08).

Líder masimu instituisaun F-FDTL ne’e husu agradesementu wa’in ba komunidade Damalara ne’ebé oferese sira nia rai hodi harii baze milítar.

Ho konstrusaun baze milítar iha Damalara ne’e nu’udar baze milítar foun iha parte Norte ne’ebé bele ajuda instituisaun F-FDTL hodi garante soberania nasaun no povu nu’udar konstituisaun haruka.

“Agradese ba komunidade Damalara bele dispoin fó rai ba forsa armada hanesan lutu nasaun nian. Damalara hanesan baze milítar nian iha parte Norte, forsa nia ejizte atu defende nasaun no povu nia interese”, tenik nia.

Lere husu ba membru milítar sira ne’ebé aban bainrua hetan destakasaun iha baze milítar Atabae tenke kria dame no paz, respeita komunidade no serbisu hamutuk parte polisial hodi aseguea liña fronteira ho di’ak.

“Ha’u husu ba forsa sira aban bainrua mai iha ne’e tenke hamutuk ho komunidade no inan-aman, tenke kria dame. Iha ne’e tenke respeita malu, forsa ho PNTL tenke serbisu hamutuk hodi fó seguransa iha fronteira”, katak, Lere Anan Timur.

Espetativa no antisipa ba ameasa esterna ba soberania nasaun iha futuru sai polítika perioridade ba Governu liu-liu Ministériu Defeza ne’ebé tau ona planu atu kontinua harii baze milítar iha Suai – Covalima no rai ketan Oecusse – Ambeno.

Tanba, tuir Lere Anan, ameasa konvensional no naun konvensional ba nasaun no povu bele mosu bainhira de’it iha futuru, nune’e presiza prepara an antes.

“Tenke prepara an, tanba inimigu aban bainrua mai hosi ne’ebé, ita la-hatene. Tuir planu sei harii (baze milítar) tan iha Suai no Oecusse”, Afirma, Lere. (Editór, Caleri).

Pin It

Follow us on Twitter

Sign up via our free email subscription service to receive notifications when new information is available.