18
Sat, Sep
1 New Articles

Ermera Livre, Díli Kontinua Estende KO Loron 7 Tan

Reuniaun Konsellu Ministru iha loron 1 Setembru 2021 iha Salaun Ministeriu Finansa. Foto, Mídia Ministériu Defeza.

Flash News

Díli-SMI: Rezultadu reuniaun Konsellu Ministru – KM ohin, (01/09) deside kontinua estende semana ida tan implementasaun Konfinamentu Obrigatóriu – KO iha munisípiu Díli hosi loron 2 to’o 9 Setembru 2021 no hapara ona impozisaun KO jerál iha Munisípiu Ermera ne’ebé fulan kotuk identifika pasiente COVID-19 varian delta ho númeru as.

“Desidi ona atu mantein Konfinamentu Obrigatóriu Jerál (lockdown) ba populasaun iha munisípiu Díli, inklui ema ne’ebé maka vasina kontra COVID-19, loron 2 - 9 fulan-setembru tinan 2021. La renova impozisaun Konfinamentu Obrigatóriu Jerál (lockdown) ba populasaun iha Postu Administrativu Ermera no Railaku, iha Munisípiu Ermera”, katak, Komunikadu Imprensa, Kuarta, (01/09).

Liu-hosi estensaun KO iha munisípiu Díli ba sidadaun sira hotu tantu simu ona vasina kompletu (segundu doze) no seidauk vasina mós kontinua hela iha uma, sekarik sai wainhira iha nesesidade duni ne’ebé relasaun ho saúde no serbisu administrasaun seluk.

“Ema sira hotu iha Munisípiu Dili, inklui sira ne’ebé maka vasina kontra COVID-19, kontinua hela iha uma, bele sai de’it tanba razaun Saúde, ba serbisu (iha kazu administrasaun públika, superiór ierarkiku define funsionáriu ne’ebé maka dispensadu husi dever komparénsia), atu asesu ba sasan no serbisu ba nesesidade bázika no atu simu vasina kontra COVID-19”, katak komunikadu ne’e.

Maibe, impoin fali Serka Sanitariu – SS iha munisípiu Manufahi durante semana rua nia laran hodi bandu sidadaun sira labele halo viazen tama ka sai hosi munisípiu refere.

“Impoin serka sanitária iha Munisípiu Manufahi, hahú husi loron 2 fulan-setembru to’o loron 15 fulan-setembru tinan 2021. Bandu ema atu tama no sai husi munisípiu ne’e, exetu tanba siguransa públika, saúde públika, asisténsia umanitária, manutensaun sistema abastesimentu públiku ka realizasaun interese públiku.

“Proibisaun hirak ne’e la abranje ba ema hirak ne’ebé maka komprova ona vasinasaun kompleta (doze rua) kontra COVID-19, nune’e mós ba labarik ki’ik sira ho idade tinan neen mai-kraik ne’ebé akompaña ema sira ne’e”, katak, komunikadu ne’e.

Reuniaun KM ne’e mós deside taka ba públiku estabelesimentu komersiál, industriál, artezanál ka prestasaun servisu iha setór privadu ekonomia sira hotu ne’ebé dezenvolve atividade iha munisípiu Dili. (Editór, Caleri).

 

 

Pin It

Follow us on Twitter

Sign up via our free email subscription service to receive notifications when new information is available.