Díli-SMI: Governu atúal ne’ebé lídera hosi Primeiru Ministru – PM, José Maria Vasconselhos alias Taur Matan Ruak, aprova ona projeitu Dekretu Lei hosi alterasaun dahuluk ba Dekretu Lei nú. 18/2012, loron 4 fulan-Abril hodi kria subsídiu ba inan isin-rua ho razaun atu hadi’a saúde no nutrisaun maternal no infantil.
“Ho projetu Dekretu-Lei ida ne’e, atu reforma programa “Bolsa da Mãe” , ho hanoin atu garante katak ida ne’e bele gere impaktu signifikativu ida hodi hamenus ki’ak no ba promosaun kapitál umanu nasionál.
“Bolsa da Mãe” hahú atu integra prestasaun adisionál rua, ne’ebé ho objetivu atu fó apoiu sosiál ba inan isin-rua no ba primeira infánsia, hodi hadi’a saúde no nutrisaun materna no infantil, atu promove inkluzaun ekonómika no atu fomenta ekonómia lokál”, dehan, komunikadu Imprensa ne’ebé SMI asesu, Kuarta, (01/09).
Tuir komunikadu ne’e, katak, programa Governu atu fó apoiu subsídiu bai nan isin-rua ne’e sei implementa iha teritóriu laran ho fazeadamente durante tinan 5 nia laran, hahú hosi tinan oin iha munisípiu parte Oeste nian.
“Programa sei implementa ho forma fazeada ka progresiva, hodi asegura hanesan prioritária atuasaun iha área jeográfika ho indíse ki’ak no má nutrisaun no protesaun ba inan isin-rua no primeira infánsia. Nune’e, programa sei haluan ba teritóriu nasional tomak durante tinan 5, hahú iha tinan 2022, ho munisípiu Ainaro no Bobonaro no ho Rejiaun Administrativa Espesiál Oe-kuse Ambeno (RAEOA)”, esplika komunikadu ne’e.
Iha komunikadu mós esplika, hahú tinan 2023 Governu sei loke luan ba munisípiu hat (4) mak hanesan Covalima, Liquiça, Manatuto no Viqueque.
No, tuir mai iha tinan 2024 kontinua abranje tan ba munisípiu hat (4) tan no ikus liu iha kapitál Díli iha tinan 2025.
“Iha tinan 2023, Bolsa da Mãe – jerasaun foun sei haluan ba munisípiu Kovalima, Liquiça, Manatuto, no Viqueque. Munisípiu Ermera, Baukau, Aileu no Lautém sei inklui iha programa tinan 2024 nian, ikusliu, Bolsa da Mãe sei abranje iha munisípiu Díli, iha tinan 2025”, tenik komunikadu ne’e.
Projetu Dekretu Lei ne’e aprezenta hosi Vise Ministra Solidariedade Sosiál – MSS, Signi Chandrawati Verdiál, durante reuniaun Konsellu Ministru – KM ne’ebé ikus mai hetan aprovasaun atu implementa. (Editór, Caleri).
