04
Sat, Dec
0 New Articles

La Vasina, Timoroan Besik 100 Ona Mak Mate Ho COVID-19

Ekipa protokulu saúde hakohi mate-isin timoroan ne’ebé mate ho COVID-19. Foto, Arkiva SMI.

Flash News

Díli-SMI: Dezde tinan kotuk wainhira pendémia COVID-19 tama  Timor-Leste to’o orseik, (06/08) parte Governu liu-hosi Ministériu Saúde – MS rejista ona maizumenus ema ualu nolu resin rua (82) mak mate ona ho moras virus corona, maioria seidauk vasina durante ne’e.

“Óbitu ne’ebé relata ohin (Segunda, 06/09) mate foun rua (2).  Ho nune’e, totál Óbitu iha Timor-Leste hamutuk 82”, dehan, Kordenador Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, Segunda, (06/09).

Dadus ema feto na’in 2 mate ho COVID-19 ne’e akontese iha munisípiu Bobonaro no kapital Díli rasik ho idade entre 64 to’o 76.

Timoroan feto na’in 2 ne’ebé mate ho COVID-19 ne’e hetan diagnóstika hosi sentru saúde difirente hanesan Maliana no HNGV deteta hetan Sindroma Insufisiénsia Respiratória Aguda (SIRA) tanba COVID-19.

“Feto, idade tinan 76, timoroan, hela iha Maliana, seidauk vasina, iha 31 Agostu 2021, diagnóstikadu iha Ospital Referénsia Maliana, ho sindroma insufisiénsia respiratória aguda (SIRA) tanba COVID-19. Matebian sofre mós diabete, iha istoria tratamentu tuberkuloze pulmonar, istoria AVC iskémiku ho hipertensaun.

“Feto, idade tinan 64, timoroan, hela iha Dili, seidauk vasina, iha 25 Agostu 2021 diagnóstikadu iha HNGV, ho sindroma insufisiénsia respiratória aguda (SIRA) tanba COVID-19”, tenik, Rui Araújo.

Tuir rezultadu teste loron rua liu-ba ne’ebé parte Laboratóiu Nasionál Saúde halo hamutuk 275 PCR ho nia detallu mak hanesan Vijilánsia sentinela hamutuk 20, Contact tracing hamutuk 31, Random Screening hamutuk 54.

Nune’e mós Teste PCR ne’ebé halo  iha Munisipiu sira seluk, RAEOA & HNGV hamutuk 287 mak hanesan munisípiu Baucau hamutuk 71, Ermera 0, Maliana 11, Maubisse 24, RAEOA 27, Suai: 15, Viqueque 0, Lautém 11 no Díli – HNGV 128.

Kazu foun relata iha loron rua liu-ba hamutuk 80 ne’ebé identifikadu iha munisípiu 3 hanesan Díli hamutuk kazu 56, Baucau hamutuk kazu 12, RAEOA hamutuk kazu 10 no munisípiu selu hamutuk kazu 2. (Editór, Caleri).

 

 

Pin It

Follow us on Twitter

Sign up via our free email subscription service to receive notifications when new information is available.