Díli-SMI: Durante ne’e maizumenus timoroan hamutuk ema liu mil 800 mak halo simu ona vasina dezde Governu implementa programa vasinasaun iha fulan Abril tinan ida-ne’e, no rejista ona ema na’in 100 mak mate ho COVID-19, hahu hosi 2020 to'o loron 16 Setembru 2021, tinan ida-ne'e.
“Kazu konfirmadu ho Covid-19 ne’ebé rejista desde Marsu 2020 to’o 16 Setembru 2021 hamutuk 18.786, kazu ativu 2756 no hamate ona ema na’in-100. Timor-Leste simu ona totál vasina hamutuk liu 1,1 miliaun, hosi númeru ne’e implementa ona liu 800 mil”, dehan, Primeiru Ministru, Taur Matan Ruak, ba jornalista sira hafoin hala’o enkontru semanal ho Prezidente Repúblika, Francisco Guterres Lú Ólo, Kinta, (16/09).
Hosi totál vasina liu millaun ida ne’ebé Timor-Leste simu durante ne’e, hela vasina liu 200 mil mak seidauk uza ba vasinasaun, liu 800 mil mak uza ona hodi halo vasina ba timoroan sira iha teritóriu laran.
“Timor-Leste simu ona total vasina hamutuk liu 1,1 miliaun, husi númeru implementa ona liu 800 mil no sei iha vasina hamutuk liu 200 mil ne’ebé naton ba sidadaun sira ne’ebé seidauk simu vasina”, tenik, Taur Matan Ruak.
Jeralmente, sidadaun sira iha kapitál Díli mak simu ona vasina primeiru no segundu doze ho presentajen boot kompara ho munisípiu sira seluk.
No, kobertura presentajen simu vasina iha teritóriu laran tomak ho primeiru doze hamutuk 53,9% no segundu doze hamutuk 30,7%.
“Díli nu’udar munisípiu ida ne’ebé nia populasaun hetan ona vasina primeira doze hamutuk 75.7% no segunda doze 61,7 %. Kobertura vasina ba Timor-Leste laran tomak ba primeira doze nian atinji ona 53,9 % no segunda doze 30,7 %”, esplika, líder Governu ne’e
Maske nune’e, eis Prezidente Repúblika ne’e husu ba autoridade kompetente hanesan Ministériu Saúde atu kontinua esforsu hodi hasa’e persentajen kobertura hodi nune’e bele asegura sidadaun sira hosi moras COVID-19 nian.
Husu mós ba sidadaun hotu atu bele tuir programa vasinasaun nasionál ne’ebé Governu halo relasiona ho luta kontra pandémia COVID-19.
“Husu para kampaña vasinasaun ne’e lais no husu apoiu populasaun sira nian, para sira kontribui,” katak, nia.
Kontinuasaun hosi programa vasinasaun nasionál ne’e, Governu kontinua halo esforsu boot atu sidadaun hotu-hotu iha Timor laran tomak bele tuir vasina, inklui ba labarik no foin-sa’e sira ho idade12 to’o 18. (Editór, Caleri).