Díli-SMI: Sosiadade sivil hanesan Fundasaun Mahein – FM ne’ebé tau matan ba asuntu seguransa no defeza sujere ba Governu atu labele implementa hanoin eis Ministru Interinu Interior no atúal Ministru Defeza, Filomeno Paixão, nia hanoin atu halo de’it rekrutamentu ba miítar hafoin halo transferensia ba polísia.
“Fundasaun Mahein nia observasaun dezde Ministru Defeza asumi nia kna’ar nu’udar Ministru Defeza no Ministeriu interior interinu, governu hakarak halo rekrutamentu ba de’it membru F-FDTL depois transfere ba PNTL. FM hare katak planu ida ne’e ladun hapar ho PNTL nia misaun ne’ebe preve iha konstitusaun RDTL.
“FM rekuiñese duni presiza halo konsolidasaun amizade entre membru hosi instituisaun Forsa Armada no PNTL atu evita kompetisaun no halakon ego institusional ne’ebé bele implika ba prestasaun kna’ar iha terinu, nune’e mos hases hanesan krize 2006. Maibe FM mos preokupa li-utan katak labele iha dominasaun ka militaristika institusaun PNTL”, dehan, FM liu-hosi publikasaun ofisial, Kinta, (04/11).
Tuir FM katak, instituisaun Falintil Forsa Defeza Timor-Leste F-FDTL ho Polísia Nasional Timor-Leste - PNTL iha diferensia misaun ho responsabilidade. F-FDTL nia misaun klaru ba defeza nasional ka ameasas eksterna, iha sorin seluk, PNTL hatan ba seguransa nasional internalmente ho karakter polisiamentu komunitáriu.
Relasiona ho ida-ne’e, kultura ida ne’e dezenvolve ona dezde PNTL hari’i ho nia lei organika ne’ebé pasa iha 2004 no halo revizaun dahuluk iha 2009, PNTL investe ona ba polisiamentu komunitariu atu hari’i polísia ida ne’ebé besik liu ba komunidade, halo servisu hamutuk ho komunidade, no resposta atuasaun sira iha komunidade ho aproximasaun dialogu komunitariu.
Organizasaun Naun Govermental – ONG ne’ebé funda iha 2009 ne’e preoukupa atu labele hamosu tan repitasaun kazu rekrutamentu konjunta sira hosi instituisaun judisiáriu sira iha tempu anterior hodi labele hamosu preokupasaun públiku.
“Fundasaun Mahein nia preokupasaun maka Timor-Leste bele halo repetisaun istoria ba kazu rekrutamentu konjunta ba autor Judisial nia iha tinan hirak liu ba. Rekrutamentu konjunta ba autor Judisial ne’ebe rezulta valor a’as maka hetan seleksaun sai Juiz, no valor natón ba iha Prokuradoria no valor ladun natón ba iha Defensoria.
“Ho esperensia ida ne’e, FM bele atensipadamente halo espekulasaun katak refere ba opiniaun rekrutamentu konjunta ba F-FDTL ho PNTL mos bele hanesan ho kazu prosesu rekrutamentu ba autor Judisial sira, nune’e valor boot nia hetan ba pozisaun vaga F-FDTL, no valor lanatón ba vaga PNTL. Se ida ne’e maka akontese entaun Governu hahu ona soran instituisaun rua ne’e antes halo rekrutamentu”, eplika iha pajina ofisiál FM.
Nune’e, FM la-konkorda ho hanoin Ministru Defeza, Filomeno Paixão, kona-ba rekrutamentu konjunta membru F-FDTL – PNTL ne’ebé husu hela orientasaun hosi Governu kona-ba prátika implementasaun polítika rekrutamentu milítar no polísia iha 2022.
“FM rejista iha ne’e, mak FM kontinua suporta mekanizmu rekrutamentu ne’ebé durante ne’e aplika, to’o hein ba kriasaun kaderneta PNTL kompletu. Tamba dadaun ne’e sistema rekrutamentu F-FDTL ne’e la’o diak”, katak FM.
Ministru Defeza, Filomeno Paixão, rasik hala’o ona enkontru ho Primeiru Ministru, Taur Matan Ruak, iha loron 18 Outubru 2021 hodi ko’alia kona-ba asuntu rekrutamentu konjunta milítar no polísia ne’e rasik. (Editór, Caleri).
